2022ko aurrekontuaren proposamena aurkeztu du udal gobernuak
21 milioi eurotik gorako partidaren %60 oinarrizko zerbitzu publikoetara eta gizarte zerbitzuetara bideratuko dute. 2021ekoa baino %4 altuago da kopurua.
Gaur aurkeztu dute 2022rako aurrekontuaren proposamena. Ezker-eskuin: Lore Suarez eta Izaskun Gomez (PSE-EE) eta Loreto Osa (EAJ). 
Pasaiako udal gobernuak (PSE-EE eta EAJ) 21.049.127 euroko aurrekontu proposamena aurkeztu du 2022. urterako; aurreko urtekoa baino %4,18 altuagoa. Kopuru hori Udalak Finantzatzeko Foru Funtsa behin betiko onartu aurrekoa da, eta gora egingo duela ziurtatu dute arduradunek, zuzenketa tekniko bat dela-eta.
Ahalegin ekonomiko nagusia oinarrizko zerbitzu publikoak finantzatzeko erabiliko dute datorren urtean, %41 (8 milioi euro) udaltzaingo, hirigintza, bide publiko, estolderia, edateko ur, garbiketa, argiteria eta alor bereko ekintzetara bideratuko delarik.
Beste ardatza (aurrekontuaren %20) gizarte zerbitzuak izango dira, 4 milioitik gora zerbitzu horiek barne hartzen dituzten etxez etxeko arretara, gizarte-larrialdietarako laguntzetara, berdintasun alorrera edo lanbide heziketara, besteak beste, bideratuko direlarik.
Izaskun Gomez alkateak aitortu du “aurrekontu soziala” egitea izan dutela lehentasun, pertsonak erdigunean jarriz. Ildo berean mintzatu da Loreto Osa (EAJ): “Bazterkeria egoeran dauden pertsonen integrazioaren aldeko apustu garbia egin da, bizikidetza sustatuz eta herritarren arteko desberdintasunak murriztuz”.
Alkateak “proposamen irekia” egin die oposizioko taldeei aurrekontu proiektua haiekin eztabaidatzeko, eta ziurtatu du herriko gobernua “haiekin akordioak lortzen saiatuko dela, pasaitarren interes orokorraren mesedetan”.
Barrutikako inbertsioak
Aurrekontu proiektuak inbertsioetarako atal bat jasotzen du, (632.500 eurokoa, osoaren %3). Diru hori hirigintzako jarduketetara bideratu nahi dute, hain zuzen, hainbat espazio eta udal eraikin birgaitzeko, hala nola: haur parkeak, Donibaneko ludoteka, San Pedro eta Donibaneko kirol-instalazioetan galdarak, edo Andonaegiko futbol zelaiko argiztapena.
Honakoak dira, atalka, aipaturiko bi arloetako inbertsioen proposamenak:
