Ikus-entzunezkoak sormenetik lantzeko bi tailer Herri Arte Eskolan
Argazkilaritza estenopeikoa (4 saio) eta Artearen Historiaren animazioa (8 saio) dira antolatu dituen bi tailerrak.
Ikus-entzunezko bi ikastaroetarako izen ematea zabaldu du Herri Arte Eskoak. Arlo hori sormenetik lantzen hasi nahi du hilabetean behineko maiztasuna izango duten saio trinko batzuekin. Argazkilaritza estenopeikoa (4 saio) eta Artearen Historiaren animazioa (8 saio) dira antolatu dituen bi tailerrak.
Argazkilaritza estenopeikoan metalezko ontziekin argazki kamerak eraikitzen dira eta argazkilaritza teknikaren hastapenetara bidaiatuko da ikaslea. Irudigintza primitiboan murgiltzeko aukera izango da. Hiru orduko lau saio egingo dituzte (45 euro). Izen ematea hilaren 29ra arte dago zabalik.
Bigarren tailerrak, berriz, artearen historia jorratuko du, irudiak mugimenduan jarri, eta soinu errealak gehituta. Horretarako, storyboardaren diseinua, stopmotion prozedura, film laburren soinuztapenerako Foley teknika, edizio prozesurako softwarea… landuko dira. Lau orduko zortzi saio antolatu dituzte (95 euro). Izen ematea, azaroaren 5era arte dago zabalik.
Herri Arte Eskolaren Su Txikian ildoaren barruan kokatuta daude bi tailer horiek.
