Zergak izoztea proposatu du PSE-EEk
Ordenantza Fiskalak aztertuko ditu udalbatzak datorren asteartean. Pasa den ostiralean aurkeztu zuen bere proposamena gobernu taldeak—EH Bildu eta Elkarrekin Errenteria—. eta gaur, berea aurkeztu du alderdi sozialistak Isaac Palencia bozeramailearen eskutik.
Isaac Palencia PSE-EEren bozeramailea. Ordenantza Fiskalak aztertuko ditu udalbatzak datorren asteartean. Pasa den ostiralean aurkeztu zuen bere proposamena gobernu taldeak—EH Bildu eta Elkarrekin Errenteria—. eta gaur, berea aurkeztu du alderdi sozialistak Isaac Palencia bozeramailearen eskutik.
Zerga eta tasak izoztea, eta arlo sozial, ekonomiko, ingurumen eta kulturarekin lotutako neurri sortak osatzen dute proposamen hori. Pandemiak sortutako egoera pixkanaka gainditzen ari bada ere, herritarren eta udalerriko saltoki txikien egoera zaila izaten jarraitzen duela uste du alderdi sozialistak, eta aldunditik 2022an jasoko diren laguntzen aurreikuspena positiboa dela, “testuinguru horretan oinarrituta egin dugu gure proposamena”. Koherentziaz jokatzea ere badela esan du Palenciak, eta Irun, Eibar, Pasaia edota Andoingo udaletan jarri du begirada: “Horietan zerga eta tasak izoztea proposatu dugu, eta batzuetan, gainera, Eibarren kasu indar politiko guztiek babestu dute neurri hori. Ez genuke ulertuko, beraz, Errenterian, berdin ez berdin izatea”.
Neurri sorta bat ere proposatu dute, Palenciak azaldu duenaren arabera, “arduraz eta seriotasunez osatutakoa”. Tartean, bost nabarmendu ditu gaurko agerraldian. Trakzio Mekanikoko Ibilgailuen gaineko Zergan auto elektriko hibridoei hobaria ezartzeko bost urteko epealdia ezabatzea da horietako lehena. Kultura sustatzeko neurriak ere proposatu ditu, eta horien artean, eraikin publikoen erabileragatik ordaindu beharreko tasaren igoera bertan behera uztea eskatu du, “%15 eta %100 arteko igoera aurreikusoa dago, eta uste dugu neurri desegokia dela kultura sustatzeko. HArago, pandemiaren ondorioak pairatzen jarraitzen dugun testuinguru honetan”.
Oinarrizko Errenta edo eta Larrialdi laguntzak jasotzen dituzten familien kasuan, Xenpelar Tailerretan matrikularen gaineko hobaria %100 izatea eskatu du, “beste hainbat zerbitzutan egiten den moduan”.
Ostalaritzari ere erreparatu dio proposamenean PSE-EEk eta establezimenduen kanpoaldean 3 edo 5 mahai jartzeko aukera izan dezaten eskatu du, “orain mahai kopuru bikoitia baino ezin dute jarri, baina kasu batzuetan, espazio eskasagatik zailtasunak dituzte. Malgutasuna eskatzen dugu eta mahai kopurua bakoitia izateko betebeharra bertan behera uzteko eskatzen dugu”. Horrekin batera, zaborren gaineko tasaren kasuan saltoki eta ostalaritzari zatika ezartzen zaiola azaldu du Palenciak, eta horien gaineko azterketa bat egitea eskatu du datorren urteari begira.
Azkenik, gobernu egindako proposamenean, atal bat ezabatzea ere eskatu dute sozialistek. Erabilitako sinbologiagatik, kultoren batekin identifikatu daitezkeen ekintzek eraikin publikoak erabiltzeagatik ordaintzea eskatzen du, ” uste dugu neurriaren eraginkortasuna eta erabilera ez direla nahikoa argi gelditzen eta horregatik bertan behera uztea eskatzen dugu. Gabon kanta sariketa edota errege kabalgata horren barruan sartuko lirateke? Uste dugu ez dela nahikoa argia, eta hori dela eta ezabatzea eskatu dugu”.
Asteartera arte egun batzuk dituztela tartean negoziaketak egin eta adostasunetara heltzen saiatzeko esan du azkenik, Palenciak, “beste herrietan alderdi sozialistak izan duen jokaerarekin koherente jokatuko dugu, eta guretzat batez ere, erreferentziazkoak dira Irun eta Eibar, Gipuzkoako bigarren eta laugarren udalerri handienak, eta biak PSE-EEren alkatetza dutenak”.
