Bolleren sarea zabaltzen hasi dira
Ikusgarritasuna lortu nahi dute, espazioak hartzen joan, eta Euskal Herri osoan barna hedatuko den sarea josten hasi dira horretarako. Bigarrenez antolatu dute horri begira, Bollurria.
Gaztetxeak hartuko du egitarauaren zati nagusia bihar arratsaldetik gauera arte. Ikusgarritasuna lortu nahi dute, espazioak hartzen joan, eta Euskal Herri osoan barna hedatuko den sarea josten hasi dira horretarako. Bigarrenez antolatu dute horri begira, Bollurria. Antolatzaileen esanetan, bollera taldea sortzea da asmoa. Iaz Errenteria-Orereta eta Erenotzu izan ziren lanketa egiten, eta aurten Azkainek eta Donostiak egin dute bat.
Bihar arratsaldetik gauera arte hainbat ekintza antolatu dituzte sare hori josi eta euren artean harremanak sortu eta espazioak irabazten joateko. 18:00etan poteoa egingo dute herriko tabernetan barrena, eta hortik gaztetxera eramango dute jaia. Bertan, 20:00etan bingo musikatua antolatu dute, eta 22:00etan Garawi C.Jren txanda helduko da. Lilith Selektak hartuko du lekukoa 23:00etan azkenik.
Parte hartzeko izena eman behar da, baina Oreretako ekitaldien kasuan itxita dago jada. Hala ere, oraindik ere aukera dute parte hartzeko inetresdunek, izan ere, hilaren 30ean, Donostian izango da Bollurria; zehazki, Intxaurrondoko Letaman gaztetxean.
