Saneamendu plan "osoagoa" eskatzeko sinadura bilketa abiaraziko dute
Aurkeztutako proiektuarekiko desadostasun eta haserrea ageriko egin eta iragarri dute herritarren proposamenekin sinadurak bilduko dituztela.
40-50 bat bizilagunen ur beltzak zuzenean itsasora isurtzen jarraituko dira saneamendu sarearen plangintzaren arabera. 
Atzo arratsaldean egindako herri batzarrean euren “desadostasun eta haserreak” ageriko egin zituzten adin guztietako hainbat sanjuandarrek. Dituzten proposamenak dokumentu batean jasotzen ari dira, eta horiekin sinadura bilketa bat abiaraztea dute asmo, udalari lanak birplanteatzeko eskatzeko.
Beste hainbat kezkaren artean, uste dute proiektua osagabea dela, sareak 40-50 bat bizilagunen arazoari ez baitie erantzungo: “Aurkeztutako proiektuak ez du konpontzen saneamenduaren arazoa modu integral batean, hainbat etxebizitzetako hondakin urak itsasora isurtzen jarraituko baitira, eta hori guztiz onartezina da”.
Gaitzetsi dute, halaber, lurpeko zerbitzuen berrikuntzak ez duela gasa barne hartuko, Donibaneko alde zaharreko bizilagunak “kondenatuz” euren bizkarretan eramatera butano-botilak; nabarmendu dute, gainera, barrutiko zonalde horretan adineko lagun asko bizi direla.
5 urteko epearekiko kezka ere agertu dute. Obrak aldian aldiro eteteko erabakia “besteren interesak” herritarren beharren gainetik jartzearen ondorio dela uste dute.
Hori esanda, sinadura bilketa bat abiaraziko dute aipaturikoak galdegiteko. Honela zehaztu dituzte horiek: “Soluzio osoa behar dugu, saneamendu arazoak integralki konponduko dituena, bizilagunei gas hornidura bermatuko diena, eta hori ahalik eta eperik laburrenean egin dadin, bai lanen hasierari dagokionez, eta bai horien iraupenari dagokionez ere”.
