Antxo berrantolatzeko "eztabaida zabala" galdegin du Ezker Anitzak
Biteri plazako eraikin berria azoka bota aurretik eraikitzeko eta anbulatorioa bertara lekualdatzeko aukera aztertzeko eskatu du koalizioak, besteak beste.
Artxibo irudia. Topoaren lurperatzearen karietara egindako herri protesta. 
Pasaiako Ezker Anitza-IUk mozio bat erregistratu du, hurrengo udalbatzarrean aztertua izan dadin, non galdegiten duen, beste hainbat konturen artean, Hirigintza Aholku Batzordea deitzeko, Antxoko topoaren lurperatzeak askatuko dituen lur eremuen gainean hausnartzeko.
Erakunde politikoak uste du barrutiaren berrantolamenduak topoaren lurperatzeaz eta biaduktuaren eraisteaz haratago joan beharko lukeela. Besteak beste, eskatu dute azoka ordezkatuko duen eraikina gaur egungoa bota aurretik egin dadila, edota anbulatorioari behin-betiko kokapena eman diezaioten.
Azken horri dagokionez, gogora ekarri dute osasun zentroak urteak daramatzala behin-behineko barrakoietan zerbitzua ematen, Luzuriaga urbanizatzeko bigarren fasea gauzatu ez zenez gero.
Fabrika zaharrak, azokaren eraikin berriarekin kointzidituz, aukera berriei ateak irekiko dizkiela uste dute: “Luzuriagak gizarte- eta kultura- jarduerentzako behin betiko espazioa izan beharko luke, eta Biteri plazako eraikinak anbulatorioko instalazioak barne har ditzake”.
Hori horrela, sinestun dira barrutian egingo diren lanek, egungo topoaren zubiak eraisteaz gain, beste hainbat onura eskaintzen dizkiola barrutiari espazio publikoa nahiz trafikoa berrantolatzeko. Horien gainean erabakitzeko ezinbestekotzat jo du bizilagunen parte hartzea, Aholku Batzordea deitzearekin batera: “Antolamendu urbanistikorako nahiz herritarren parte hartze handiagotzeko tresna baita”.
