Gau Beltza ate joka da
Bigarren urtez, herritik herriarentzat gau beltza antolatu du Orereta Ikastolak. Helburua, herriko eragileen eta oreretarren parte hartzea bultzatzea dela esan du ikastolak.
Gau Beltzaren artxiboko irudia. Argazkia: Orereta IKastola Bigarren urtez, herritik herriarentzat gau beltza antolatu du Orereta Ikastolak. Helburua, herriko eragileen eta oreretarren parte hartzea bultzatzea dela esan du ikastolak. Hilaren 31ko ilunabarrean 19:30ean Santa Klara kaletik abiatuko du ibilbidea Kalabaza Bideak, Kalabaza gurdiak, trikimako gaineko orekariak, dantza, musika, kriseilu zein lastargien argiak lagunduta, eta mozorrotuta, uzta garaiari agur esan, eta neguan sartzeko. Lau Haizetara Euskaltzaleon Topaguneak, Amulleta Danbor Kofradiak, Xenpelar AEK Euskaltegiak, Ereintza Dantza taldeak, Urdaburu Mendizale elkarteak, eta Asiolako begiraleek bat egin dute antolaketa lanetan.
Santa Klaratik abiatuta, herriko hainbat kale pasata, Zumardian ekitaldi nagusia egingo dute. Eragileek euren emanaldiak eskainiko dituzte bertan, eta ondoren, beldurren lapikuan, izuak erreko dituzte. Zezen suzkoarekin amaituko da festa, 20:30ak aldera.
Duela bi urte Gau Beltza berreskuratzearekin batera mikroipuin lehiaketa eta ikus-entzunezkoa abiatu zuen Orereta Ikastolak, eta aurten ere egingo dute. DBH 1etik gorako ikasleei begirakoa da lehiaketa hori, eta hilaren 31etik abenduaren 3ra arte —Euskararen Eguna— izango da parte hartzeko aukera.
Gau beltzaren antolaketaren atzean, Orereta IKastolako langile taldea dago; ikastolaren balio eta izaerarekin bat datorrela sinetsita ekin zioten antolaketari. Egunaren gaineko bizipen eta usadioak aldatu direnaren jakitun, garai bateko Gau Beltza berrskuratzeko saiakera sendoa egin du Orereta Ikastolak.
Errenteria-Oreretan Gau Beltza ospatzen zenaren testigantzak izan badirela dio, eta horren berri eman du ikastolak: “Erdiko kaleko haurrak, Gaztañoko baratzetara joaten omen ziren kalabaza bila, hustu, eta kalean bertan, zein hilerri zaharrean jartzeko. Hamarkada batzuetan usadioa eta kalabazak itzalita egon badira ere, orain urte batzuk, Erdiko kaleko familia batzuk Gau Beltza ospatzen hasi ziren berriro”.
Orain jaia birsortzea du helburu Orereta Ikastolak, “herria, komunitatea, aniztasuna, berdintasuna, izaera, eta euskara ardatz hartuta”. Antolaketara “gogoz eta ilusioz” batutako eragileei eskerrak eman dizkie, “ezinbestekoa delako horien ekarpena”, eta herritarrak parte hartzera deitu ditu, ahal dela mozorrotuta, “izan ere, gau beltzak herritik herriarentzat sortutako festa izan nahi du, eta hala desio duen herritar oro dago parte hartzera gonbidatuta”.
