"Txabola botatzeak berriz ere agerian jarri du okupazio indarrak Jaizkibeldik eta Euskal Herritik kanporatzeko premia"
Azabaratzako Sahatsa borda eraitsi dutelako, protesta bilkura egin dute Lezon. Arazoa, ordea, eraiste horretatik harago doala salatu dute.
Astelehenean Jaizkibelgo Azabaratza eremuko Sahatsa bordaren eraistearen kontrako elkarretaratzea egin zuten atzo arratsean Lezon, udaletxearen atarian. Hamarnaka izan ziren deialdiarekin bat egin zuten lezoarrak. Militarrek eraitsi zuten herri ekimenez, eta herritarren erabilerarako (bidaiariak, arrantzaleak, naturaren zaleak…) altxatako etxola.
Eraikinaren deuseztea arazo puntuala baino, egiturazkoa dela adierazi zuten atzoko bilkuran izan zirenek: “Militarren presentziak beste hainbat kalte eragiten ditu mendian. Lezon herri mugimenduak askotan salatu ditu militarrek Jaizkibelen naturari egindako txikizioak. Txabola botatzeak berriz ere agerian jarri du okupazio indarrak Jaizkibeldik eta Euskal Herritik kanporatzeko premia”.
Militarrek asteartero euren maniobra eta entrenamenduak egiten dituzte Jaizkibelgo eremu okupatuan, baita beste hainbat egun puntualetan ere. “Herritarrak inguru horretatik uxatzen saiatzen dira naturaren Kontserbazio Berezirako Eremu izendatutako lurrean”. Horregatik, lezoarrek salatu dute mendiaren erabilera eta bertatik igarotzeko eskubidea ukatzen zaiela inguruko herritarrei. “Esaterako, astelehenean bi lagun identifikatu zituzten kostaldera jaisten ari zirenean, eta militarrak haien kontra oldartu ziren”.
Sahatsa txabolaren kasuan fokua jarriz, hura eraistearen nahia aspaldikoa dela adierazi zuten atzoko elkarretaratzean. Horren jakitun izanda, hainbat erabiltzaile argibide bila joandakoak ziren Pasaiako eta Lezoko udaletara, nahiz militarrengana. Inork ez zien zehaztasunik eman, informaziorik ez inon.
