Mende erdia bizitzarako bitartekoak ematen
1971eko urrian zabaldu zituen ateak Koldo Mitxelena Institutuak, "lorpen handia izan zen —diote egungo zuzendaritzako kideek— garai hartako udal ordezkarien lana eta iraunkortasunaren ondorio".
Gaur egin dute urteurrena ospatzeko lehen ekitaldia Koldo Mitxelena institutuan. argazkia: Koldo Mitxelena BHI Koldo Mitxelena BHIk 50 urte bete ditu. Mende erdia. Francoren diktadurapean ikusi zuen argia, 1971-1972 ikasturtean. Orduan, batxilergoa egiten zuten ikasleen kopurua txikia zela oso nabarmendu dute institutuko arduradunek, eta egitekotan, Donostiara jotzea ezinbestekoa zela: “Udalak baina, aldarrikatu zuen Errenteria-Oreretan irakaskuntza ertainen institutu bat izatea, Lezo eta Oiartzunerako ere, erreferentzia zentroa izango zena”.
1971eko urrian zabaldu zituen ateak Koldo Mitxelena Institutuak, “lorpen handia izan zen —diote egungo zuzendaritzako kideek— garai hartako udal ordezkarien lana eta iraunkortasunaren ondorio”.
50 urte joan dira ordutik, eta belaunaldi ugari pasa dira ikastetxetik, eta ehunka nerabeen ametsak egi bihurtu dira ikasgela horietan bidea hasita; beste hainbeste amets izaten jarraituko zuten, gauzatu gabe; finean, gazteak, bizi proiektuak, ametsak, gogoak, frustrazioak ere, eta nola ez proiektuak… hamarnaka izan dira, eta beste hainbeste izango dira. Izango direnei begira, orain, gogoeta egin nahi dute ikasturtean zehar, institutuak izan duen bilakaeraren gainean, “non gauden eta batez ere Koldo Mitxelena BHIrentzat nahi den etorkizunaren gaineko hausnarketa zabaldu nahi dugu”.
1985ko martxoaren 13an, Institutuko irakasleen klaustroak proposatuz eta aho batez onartuz, ikastetxeari Koldo Mitxelena errenteriar hizkuntzalari ospetsuaren izena eman zioten. 1996-1997 ikasturtean, Derrigorrezko Bigarren Hezkuntzako lehen promozioa hartu zuen ikastetxeak
Mende erdiaren harira, ikasturtean zehar egingo dituzte ospakizunak, eta hainbat jarduera antolatu dituzte. Gaur bertan egin dute horietako lehena, ikastetxe barruan. Etorkizuna ereiten leloa duen olana zabaldu dute ikastetxearen alboko fatxadan, eta inaugurazio ekitaldi txikia egin dute ikasleekin. Aurreskua eta txistu doinuak ere presente izan dira gaurko ekitaldi horretan.
Gaurkoa, lehenengo ekitaldia izan da, baina aurrerantzean beste batzuk izango direla jakinarazi dute zuzendaritzako kideek.
