Kirol Astea "polita eta interesgarria" izan dela baloratu du udalak
Ostiralean bukatu zen VI. Kirol Astea. 200 lagun inguruk hartu dute parte ekitaldietan, eta datorren urtean kanpoko ekintzak berreskuratu nahi dira.
Guruzne Azpirozek Joxe Migel Lopezen galderei erantzun zien, Kirol Saria jaso eta gero. Oiartzungo Kirol Astea seigarren aldiz egin dute, udalak eta Kirolaisik zein herriko eragileek antolatuta. Udalak aurtengo ekitaldiaren balorazioa egin du, eta positiboa izan da.
“Egitea hainbeste kosta zaigun Kirol Aste honek emaitza polita eta interesgarria izan du”, adierazi du udalak. Maiatzean egitekoa zen, baina orduko osasun egoera zela eta, atzeratu egin dute.
Antolatu diren ekitaldiak “interesgarriak eta kalitatezkoak” izan direla gaineratu dute. “Hiru dokumental-emanaldi eta solasaldi izan ziren aurreko astean, kirola oinarri izan arren, beste gai batzuk ere erdigunean jartzeko: landa eremua, genero-arrakala, euskara…”.
Bi mahai-inguru egon direla nabarmendu dute, bata kirol-elikadurari buruzkoa eta bestea taldeko kirolen prestaketa fisikoari buruzkoa.
200 lagunen parte hartzea
Kirol Astea pasa den ostiralean bukatu zen, Kirol Sariaren banaketa ekitaldiarekin. Guruzne Azpiroz Ibarguren arraunlari ohiak jaso zuen. Udalak Azpiroz zoriondu du, “ongi merezitako” sariarengatik. Gainera, ostiraleko ekitaldian erakutsitako “zintzotasuna eta emozioa” eskertu dizkio.
Ia 200 lagunek hartu dute parte Kirol Astean antolatutako ekimenetan. Horiei guztiei ere eskerrak eman nahi dizkie Udalak, baita aurtengo Kirol Astean laguntzaile izan dituen eragileei ere: Girizia Mendi Taldea, Labore Oarso, Oiartzungo Kirol Aholku Batzordea (UKABE)…
Iragarri dutenez, datorren urterako ere antolatuko dute Kirol Astea. Helburua, barne ekitaldiez gain, kanpokoak ere antolatzea izango da. COVID-19aren aurreko filosofia berreskuratu nahi da, kirol eta jarduera fisikoaren zaleek zuten topagunarekin.
