Juanito Mitxelena omendu dute, berak gustukoen zuen moduan
Igandean hainbat bertsozale hurbildu ziren Elizalde Herri Eskolara, Mitxelena zenaren omenezko bertso saiora. Zuzenean aipatu zuten.
Josu Ibarguren oiartzuarra izan zen oholtzara igo zen bertsolarietako bat. Orain dela bi urte hil zen Juanito Mitxelena bertsolaria, eta igande arratsaldean sei bertsolari —oholtza gainean— eta 140 bat bertsozale —Elizalde eskolako kantxan— elkartu ziren. Omendua kide izan zen Oiartzungo Bertso Eskolak antolatu zuen saioa.
Amets Arzallus, Sustrai Colina, Maialen Lujanbio, Miren Artetxe eta Josu Ibarguren jarri ziren mikrofono aurrean, Alaia Martinek jarritako gaiak errimekin josteko.
Saio ona izan zen, omenaldia izanagatik, umoretsua. Hainbat ofiziotan Mitxelena zuzenean aipatu zuten. Adibidez, Colina eta Arzallusek mende hasieran Karrikako Artaso elkartean Mitxelenarekin eta beste hainbat bertsolarirekin egiten zituzten bertso saioak gogorarazi zuten.
Astearte arrats haietako anekdota eta bizipen batzuk ezagutarazi zizkieten hurbildu ziren bertsozale haiei. Beste hainbatetan, Juanito Mitxelena zeharka aipatu zuten.
Bere lau seme-alabei lore eskaintza egin zieten, eta Miren Irigoien bertso eskolako kideak Mitxelena zena gogorarazi zuen. Bideoan ikus daiteke haren hitzartzea.
[Bideoa eta argazkia Jon Martin Etxebestek helarazi ditu].
