Lezoko III. Berdintasun Planaren zirriborroa, herritarren eskura
Azaroaren 11ra arte egin dakizkioke planaren zirriborroari ekarpenak. Azaroaren 16an aurkeztuko dute behin betiko plana, udaletxean.
Lezoko III. Berdintasun Planaren osaketa azken fasean da. Azaroaren 16an aurkeztuko dute udaletxean, 19:00etan hasiko den ekitaldian. Aurretik, ordea, planaren zirriborroa jendaurrean jarriko dute herritarrek azken ekarpenak egin ditzaten.
Proposamenaren dokumentua eskuratzeko eta ondoren aztertzeko bi bide jarri ditu Lezoko Udalak. Batetik, online lortu ahal izango da, eta bestetik, Berdintasun teknikariaren bulegoan aurrez aurre eska daiteke (astelehenetik ostegunera 09:00etatik 13:00etara, eta asteartetan 15:30etik 19:30era). Hilaren 28tik azaroaren 11ra arte lor daiteke agiria.
Horri ekarpenak egiteko bi helbide elektroniko ezarri dituzte. Bat plana dinamizatu duen eragilearena da, eta bestea udaleko berdintasun sailarena.
Planak Lezoko berdintasun politikek 2025era arte jarraitu beharreko ibilbidea markatuko du. Zirriborroan 50 ekintza daude planteatuta, honako lerroekin lotura dutenak: gobernu ona, emakumeen ahalduntzea, ekonomia eta jendartearen antolakuntza aldatu, eta indarkeriarik gabeko bizimoduak.
