Gizon bat atxilotu dute bide segurtasun delitua leporatuta
Polizia kontrol batean gelditu gabe aurrera jarraitu zuen gizonak, atzetik joan zen patruila eta atxilotu egin zuten bide segurtasunaren aurkako delitua leporatuta.
Ertzaintzak atxilotu egin du bide segurtasunaren aurkako delitua leporatuta. Kontrol batean gelditu gabe alde egiteagatik 28 urteko gizon bat atxilotu du Ertzaintzak. Segurtasun Sailak emandako informazioaren arabera herenegun arratsaldean izan ziren gertakariak Errenteriako Kaputxinoak auzoko Sorgintxulo kalean. Polizia kontrol batean gelditu gabe aurrera jarraitu zuen gizonak, atzetik joan zen patruila eta atxilotu egin zuten bide segurtasunaren aurkako delitua leporatuta.
Iturri berdinen arabera, gidariak, ertzainetako bat jo zuen autoarekin, eta azken horrek jauzi egin behar izan zuen autoak harrapa ez zezan. Agentea arin zauritu zen.
Gidariak abiadura handian egin zuela ihes ere esan du prentsa oharrean Segurtasun Sailak, “debekatutako maniobvrak eginez eta oinezkoak eta bidearen erabiltzaileak arrisku larrian jarriz. Ikastetxe baten ingurutik ere igaro zen eta kalteak eragin aparkatuta zeuden hainbat autori”.
Ausarkeriaz gidatzeagatik atxilotu zuten gizona, eta gidabaimenik ez zuela ohartu ziren orduan. Alkohola eta droga probak eginda positiboa eman zuen atxilotuak, eta atzo bertan eraman zuten Donostiako epaitegira..
