Urtebeteko etenaren ostean, bueltan da Otxote Topaketa
Igandean izango da, eta bost otxotek hartuko dute parte, horietatik bi, emakumeenak. Madalenaren basilikan kontzertua eskainita, tabernetan abestuko dute ondoren.
Karnaba Otxote oreretarra da parte hartuko duenetako bat. Iaz behar zuen hamargarren ekitaldia, baina COVID-19ak ez zuen aukerarik eman egiteko. Aurten baina, bertan da, eta igandean Madalenaren basilika eta herri erdialdeko hainbat tabernak hartuko ditu Otxote Topaketak. Niessen Elkarteak antolatuta, esan moduan, iazko etenaren ondoren, aurten egingo dute hamargarren topaketa eta eztarriak inoiz baino prestuago dituzte. Basilikak hartuko du kontzertua igandean, hilaren 31n, 12:00etan. Bilboko Jatorki, Donostiako Ozenki, Oreretako Karnaba, Donostiako Easo, eta Baionako Enara otxoteek hartuko dute parte.
Urtero moduan, aurten ere, ahalegin berezia egin dute antolatzaileek emakumeen otxoteen parte harztea bermatzeko, eta haien ordezkari, bi izango dira aurten, Jatorki eta Enara.
Tabernetara eramango dute ondoren, kantu festa, 13:30etik 14:30era, eta Maite, Lekuzaharra, Gamon 14, Sindikato, eta Lekuona Fabrikako kantinan egingo dituzte kantu saioak.
