Gazteria arloaren kudeaketa 'desegokia' dela salatu du PSE-EEk
Ludoteka eta gaztelekuak ez dituela udalak oraindik martxan jarri aurten dio Isaac Palencia sozialisten bozeramaileak.
Isaac Palencia PSE-EEren bozeramailea. Gazteei begirako baliabideen kudeaketa “txarra” dela salatu du prentsa ohar bidez PSE-EEren bozeramaile Isaac Palenciak. EH Bilduk eta Elkarrekin Errenteriak gidatzen duten gobernu taldearen kudeaketa “desegokia” dela esan du, eta gazteei begirako zerbitzuak “ixtea” egotzi die. “Gazteria sailetik egiten den kudeaketa asko hobetu daiteke zalantzarik gabe. Gazteleku eta Ludotekak ez dituzte oraindik zabaldu aurten, eta gazteei begirako etxebizitzako gelen erdia hutsik da”, esan du. Urrutitik datorrela egoera hori dio, ez dela berria, “gazteen informaziorako bulegoarekin hasi zen, eta orain, Belabaratzeko gazteentzako aterpetxearekin jarraitu du”.
Ludoteka eta gaztelekuek irailean behar zutela martxan eta oraintxe esleitu dituztela zerbitzuak dio Palenciak, “ez dakigu noiz jarriko dituzten martxan”.
Gazteen Etxebizitza Komunitarioari ere egin dio erreferentzia Palenciak, “26 gelatik 11 baino ez daude okupatuta; hau da, %60 libre dago”. Gazteei begirako Arramendiko zuzkidura etxebizitzekin ez dela hala gertatzen esan du, “kudeaketa hobeago batekin 57 etxebizitzak beteta daude, eta itxaron zerrenda luzea dago”.
“Kudeaketa okerra” ez dela oraingo kontua esan du berriro, “2011z geroztik dator. Belabaratz aterpetxeari ere beste erabilera bat eman diote, betetzen zuen gazte aterpetxeari bestelako irtenbiderik eman gabe”.
