Aita Marik nabigatzen jarrai dezan hainbat ekintza antolatu ditu Laguntasunak
Behobia-Donostia lasterketaren asteburua baliatuta, hainbat ekintza antolatu ditu Laguntasuna elkarteak auzoa aktibatzeko eta bide batez, dirua biltzeko.
Laguntasuna, Gabierrotako Auzo elkarteak, hainbat ekintza antolatu ditu Behobia-Donostia lasterketa egingo den asteburua baliatuta. Helburua, auzoa eta auzotarrak aktibatzea eta jarduera sorta eskaintzea da, eta bide beretik, Gobernuz Kanpoko Erakundeak laguntzeko dirua biltzea. Zehazki, Salvamento Maritimo Humanitario da lagunduko duten elkartea Lagundu Laguntzen kanpainaren bidez, eta Aita Marik nabigatzen jarraitzea ahalbidetu nahi dute.
Hitzaldiak, solasaldiak, haurrentzako jarduerak, bazkari herrikoia, zein musikarekin osatu dute egitaraua. Bazkarirako txartelak eros daitezke dagoeneko Laguntasuna elkartearen egoitzan 18:00etatik 20:00etara. Lasterketa egunean, berriz, gosari solidarioa eta korrikalarien artean euroaren bilketa antolatu dituzte. Gasolindegi zaharrean txosna muntatuko dute, eta kamisetak salduko dituzte.
Auzo elkarteak herritar guztiak gonbidatu ditu nahi duten jardueretan parte hartzera, “denon artean errazagoa izango delako helmugara heltzea”. Informazio gehiagorako posta elektronikora mezua bidali daiteke.
