Espainiako militarrak Jaizkibeldik kanpo nahi ditu EH Bilduk
Espainiako Armadak tiro eremu bat du mendian. Bertan egindako maniobren kontrako ebazpen proposamena erregistratu du koalizioak.
Espainiako Armadak maniobra eremu bat du Jaizkibelen, mendiaren 371 hektarea hartzen dituena. Bertan tiroak, detonazioak eta bestelako gerra ariketak egitearen kontrako ebazpen proposamena erregistratu du EH Bilduk Batzar Nagusietan.
Koalizioaren ustez, ukaezina da mendigunea aisialdirako, kirola egiteko edota mendi proba ezberdinak gauzatzeko erabiltzen den eremua dela, eta bertatik (baita tiro eremu barrutik ere) “lurraldearentzat garrantzitsuak” diren Santiago Bidea eta Talaia bidea igarotzen direla (azken horrek Donostia, Pasaia eta Hondarribia lotzen ditu kostaldetik).
Horri gehitu diote militarren tirorako eremuak hartzen duen zonaldean hamarkada urte dituzten arrantzaleen txabola eta borda txikiak daudela, eta horiekiko errespetu eza gaitzetsi dute bilkideek: “Horietariko batzuk (Azabaratzako Sahatsa borda, kasu) dagoeneko eraitsi dituzte edo eraitsi nahi dituzte espainiar militarrek, inolako udal edota ingurumen baimenik eta txostenik gabe”.
Alderdiak arbuiatu du, gainera, militarrak “nagusitasun eta harrokeriaz” aritzen direla, udaletako legeei muzin eginez. “Gure ingurumenak eta herritarrak errespetatu gabe. Paraje babestuetan ere aritzen dira”. Gogora ekarri dute Jaizkibel mendia Herri Onurarako Mendi gisa eta Kontserbazio Bereziko Eremu (KBE) gisa izendatuta dagoela.
Hori horrela izanik, Gipuzkoako Batzar Nagusietan argi utzi nahi izan dute euren aldarria: “Gipuzkoarrok ez dugulako onartzen Espainiako Armada gurean”, hartarako, ebazpen proposamen bat erregistratuz.
Ebazpen proposamena
Gipuzkoako Batzar Nagusiek:
1. Jaizkibel mendia herritarren ondare natural gisa aldarrikatzen dute, bateraezina maniobra militarrak eta antzekoekin.
2. Espainiar militarrek inolako arau-babesik gabe herri erabilerarako borda bat eraitsi izana salatzen dute eta eragindako herritarrei bere atsekabea helarazten die.
3. Eusko Jaurlaritzari eskatzen diote Ulia-Jaizkibel medietako Kontserbazio Bereziko Eremua (KBE) itsas eremura zabaltzea eta itsas babesgune izendatzea, dagoeneko Gipuzkoako Biologoen Elkargo ofizialak eta beste hainbat eragilek eskatu duten bezala.
4. Espainiar Gobernuari eskatzen diote Jaizkibelgo tiro eremua berehala desegitea.
5. Espainiar Gobernuari eskatzen diote plan eta kronograma bat Armada Gipuzkoatik eta Euskal Herritik ateratzeko.
