[Erreportajea] Sareko abentura berri batera egin du jauzi Xaltok
Pailazo lezoarrak webgune propioa du orain, sortzen dituen edukiak partekatzeko. Korri eta Brinkorekin egindako aroa ez du bukatutzat eman, nahiz eta bakarkako bidea indartzeko hautua egin.
Errealitatera egokitu du Xalto pailazo lezoarrak bere webgunea. Izan ere, azken 21 urteetan bidelagun izan dituen Korri eta Brinkok beste zeregin batzuetan jarria dute indarra, eta ondorioz, Xaltoren jarduna islatzen duen Interneteko ataria osatu dute. Mikel Susperregi ipuin kontalariaren berri ere dago web atari horretan.
«Azken boladan ni bakarrik ibiltzen naiz ikuskizunak ematen, edo Xuplenterekin batera bi pailazo eskatzen dituztenean. Horregatik erabakia. Musikaria da Xuplente, xirularrua jotzen du», adierazi du pailazoak. Beraz, Korri Xalto eta Brinkoren ataria (korrixaltotabrinko.com) saretik desagertu da.
Horrek ez du esan nahi, ordea, Korri, Xalto eta Brinkoren aroa erabat bukatu denik. Beste aro bat hasi da, aurrekoa guztiz itxi gabe. Izan ere, aurretik sortutako ondare guztia jendartean dago, tartean ehunka emankizun, bi disko eta hamar liburuko ipuin bilduma daudelarik. «Iaz 20 urte bete ziren lehen emanaldia egin genuenetik, eta bagenuen asmoa hirurok batera zerbait egiteko, herrian. Baina bizi izan dugun pandemia egoerak asko konplikatu dizkigu gauzak. Etorkizun batean ez dugu baztertzen juntatzea», azaldu du Xaltok.
Aldi berean, pandemia aroak jarduna ordenatzeko balio izan duela adierazi du pailazoak, eta horren emaitza da webgune berria: «Astero bideo bat saiatzen naiz jartzen webgunean. Orotariko kontsultak ere erantzuten ditut; erronka da niretzat astero zerbait egitea. Ikuskizunak ere daude, baita tailerrak ere». Eroso dabil Xalto sareetan. Hala ere, pailazoak gustukoen duena herrietara joatea da, aktuatzera, ikusleekin aurrez aurre egotera, haurrekin tailerrak egitera. Irribarreetatik bizi da.
Mikel Susperregi
Xaltoren webgunean Mikel Susperregiren ipuin kontaketa saioak aurki daitezke, tartean, Lezoko liburutegiaren Ipuin Kapsulak egitasmorako egindakoak. Horretan sakontzeko indarrez dabilela adierazi du Mikel Susperregik.
Gainera, Bai Euskarari ziurtagiria eskuratu duela azaldu du lezoarrak: «Hainbeste urtean euskara hutsez lan egiteari balioa eman nahi izan diogu. Honetan sentsibilitatea duen jendeak baloratuko du hori».