Antxoko Nafarroa Hiribidea moztuta egongo da igandean Behobiagatik
Goizean zehar tarte batez etenda egongo da trafikoa errepide horretan, eta barrutiko irteerei ere eragingo die lasterketak. Oarso kalea erabili beharko da.
Errepide nagusia moztuta egongo denez gero, bertara daramaten irteerak ere itxita egongo dira. 
Pasaiako Udaltzaingoak jakinarazi du 2021eko Behobia-Donostia lasterketa dela medio, datorren igandean (hilak 14) Antxoko Nafarroa Hiribidean trafikoa moztuta egongo dela tarte batez. Barrutiaren irteerei ere eragingo die horrek, eta beraz, Oarso kaletik atera beharko dute ibilgailuek bitarte horretan.
Aurreikuspenen arabera, bidea 08:30a aldera moztuko dute, eta 15:30era bitarte egongo da hesituta. Udaltzainek gogora ekarri dute ordu horiek “gutxi gorabeherakoak” direla, eta probaren garapenari lotuta daudela zuzenean. Gaiari buruzko informazio gehiago behar duenak 943 00 43 00 telefono zenbakira hots egin dezake.
