Pentsiodunen mugimenduaren «batasuna» berreskuratzea ezinbestekotzat jo du Bat Etorrik
Agerraldia egin du gaur eguerdian Bat Etorri kolektiboak; pentsio publikoen defentsan bost aldarrikapen nagusi egin ditu taldeak.
Bat Etorri kolektiboaren agerraldia Herriko Plazan.
Elkarretaratzea egin du gaur eguerdian Bat Etorri kolektiboak Herriko Plazan. Pentsio publikoak defendatzeko helburuarekin, mugimenduaren «batasuna» ezinbestekotzat jo du taldeak. Bost aldarrikapen nagusi bildu ditu kolektiboak hartara: pentsioen sistema publikoa defendatzea; KPIaren eguneraketaren arabera pentsioen erosteko ahalmenari eustea; gutxieneko pentsioak lanbide arteko gutxieneko soldatarekin parekatzea; iraunkortasun faktorea behin betiko indargabetzea; eta pentsioetan genero arrakalarekin amaitzeko neurriak hartzea.
Taldekideek zabaldu dutenez, gutxieneko pentsioen «hobekuntza» da haien lehentasuna. Ildo horretan, pentsio «baxu gehienak emakumeei» dagozkiela salatu dute, eta horiek hobetzea genero arrakala murrizteko balioko lukeela sinetsita agertu dira. Hori horrela, Etxeko Langileen Erregimena Gizarte Segurantzaren Erregimen Orokorrean txeratzera, eta alarguntza pentsioak «hobetzera» deitu dute.
Azkenik, pentsiodunen mugimendua indartzeko «batasuna» jo du giltzarri Bat Etorri kolektiboak. Mugimenduaren aniztasuna aitortuta, eta helburu komun batzuetan oinarrituta, batasuna berreskuratzeko existitzen diren elkarguneen alde egin du kolektiboak «arrakasta bermatzeko modu bakar gisa».
