Oarsoaldeko ikasleen erdiak baino gehiagok egiten du Eskola Kirola
Ikasleen parte hartzea %7 igo da 2018tik. Oraindik ere gehienak mutilak diren arren (%65), nesken presentzia geroz eta handiagoa dela adierazi dute arduradunek.
Oarsoaldeko lau udalerrietako kirol zinegotziek aurkeztu dituzte datuak gaur eguerdian. 
Oarsoaldeko lau herrietako kirol zinegotziek –Irlentz Ortega (Lezo), Eneritz Arbelaitz (Oiartzun), Lore Suarez (Pasaia), eta Maite Gartzia (Errenteria)–2021-2022 ikasturteko eskualdeko Eskola Kiroleko datuak aurkeztu dituzte Lezon gaur eguerdian.
Ikasleen ia %56 ari da Eskola Kirolean gaur-gaurkoz; alegia, eskualdeko ikastetxeetan matrikulatuta dauden 8-12 urte bitarteko 2.559 gazte. Joan den 2018tik gora egin du egitasmoaren parte hartzeak (%7 inguru).
145 kirol talde daude, orotara, Oarsoaldean (iaz 134 ziren). Udalerrika eman dituzte datuak:
- 70 talde Errenteria-Oreretan.
- 35 talde Pasaian.
- 28 talde Oiartzunen.
- 12 talde Lezon.
68 entrenatzaile arduratzen dira guzti horien saioak gidatzeaz, 26 emakumezko eta 42 gizonezko. Arduradunekin gertatzen den modura, nesken parte hartzea ere nabarmen txikiagoa da Eskola Kirolan mutilenarekin alderatuz. Ikasleen %35 baino gutxiago dira neskak. Dena den, kopuruaren goranzko joera urteetan mantentzen ari dela aitortu dute arduradunek, “poliki bada ere”.
Hona hemen aurkezturiko datuen detaileak, orain dela bi urtekoekin alderatuz:
