Barrutikako proposamenak egin dizkio EH Bilduk 2022ko aurrekontuari
Koalizioak zenbait zuzenketa aurkeztu dizkio EAJ eta PSE-EEren proposamenari. Barrutiz barrutikako nahiz ildo orokorreko hainbat proiektu aurkeztu dituzte.
Koalizio abertzaleak elkarlanerako eskua luzatu dio udal gobernuari, akordio batera iristeko 2022ko aurrekontuarekin. 
2022ko Pasaiako udal aurrekontuaren proposamenari 32 zuzenketa partzial eta osoko zuzenketa bat aurkeztu dizkio oposizioko EH Bilduk. Koalizio abertzalearen helburua “pobre eta anbizio gutxiko” bezala deskribatu izan duten udal gobernuaren aurrekontua hobetzea da. Adierazi dute egin berri dituzten proposamenak “egingarriak eta bideragarriak” direla, teknikoki nahiz ekonomikoki, Pasaiako Udalak aparteko kredituak dituelako pandemiaren ondorioz.
Proposamenen ardatzak hartu dituzte ahotan: besteak beste, gizarte politika aktiboak sustatzea, bizitza soziala eta asoziatiboa berreskuratzea, kultura, gazteria eta kirol arloetan inbertsioa handitzea, eta euskararen normalizazioa bultzatzea. Horrez gain, 200.000 eurotik gorako funtsa proposatu dute merkataritza eta ostalaritza sustatzeko, eta baita gazteen emantzipazioa eta laneratzea sustatzeko plan bat ere.
Inbertsio proposamen horiez gain (500.000 euro inguru), EH Bilduk milioi bat euroko inbertsio proposamen zehatzak aurkeztu ditu, udalerriko eta barrutietako “oinarrizko azpiegiturak hobetzea” izanik helburu. Batzuk aurkeztu dituzte:
- Trintxerpe. 150.000 euroko funtsa Karmengo Ama ikastetxeko patioa estaltzeko, Mendiolabidea urbanizatzeko proposamena Azkuene 42ko luiziari irtenbidea emateko eta Rabanne plaza sortzeko, Ziriza eraikinaren eta Trintxerpeko Correosen arteko orubean berdegune bat eta aparkaleku txiki bat eginez.
- Donibane. 200.000 euro bideratzea itsaslabarraren eta mendi magalen egoera aztertuko duen azterlan geologiko bat egiteko, bai eta mendian zehar gasa bezalako udal zerbitzuak sartzeko aukera aztertzeko ere.
- San Pedro. Kanpitxu auzoaren asfaltatzea, “errepidea egoera negargarrian baitago”. Horretarako 100.000 euro baliatzea proposatu dute.
- Antxo. Biteri plazan kirol anitzeko pista bat jartzea, horretarako 55.000 euro bideratuz. Horrez gain, Luzuriagako eraikin soziokulturala lagatzeko Espainiako Estatuaren Aurrekontu Orokorretan aurkeztutako zuzenketa ere aurkeztu dute.
Barrutikako proposamenez gain, proiektu orokorragoak ere aipatu dituzte bilkideek, hala nola: udal eraikinetan eguzki plakak jartzea, itsasoaren ur mailaren igoeraren eragina neurtzeko azterlana egitea, udalerriko errepideak eta zebrabideak pintatzeko plana osatzea, edota ludotekak, gaztelekuak eta kultur etxeak bezalako udal ekipamenduak hobetzea.
