Pasaia Itsas Festibalaren bigarren ekitaldiari ekarpenak egitera deitu dute
Proposamenak egin ahal izateko azken eguna hilaren 30a izango da. Pasaiako eragile eta norbanakoen ekarpenak lehenetsiko dituzte jasotako guztien artean.
Pasaia Itsas Festibala 2018. Artxibo irudia. 
Barrutiz barruti Pasaia Itsas Festibalaren bigarren ekitaldia aurkezteko bilerak egin ostean, zabalik da eragile nahiz norbanakoek jaialdiari ekarpenak egiteko epea, hilaren 30era arte.
Festibalaren programazioaren parte izan nahi dutenen proposamenen artean pasaitarrenak lehenetsiko dituztela aitortu zuen alkateak joan den astean. Dena den, jasotako guztiak hartuko dira kontuan, baldin eta jaialdiaren “espirituarekin, filosofiarekin eta helburuekin” lotura badute. Edozein kasutan, guztiei erantzuteko konpromisoa hartu dute arduradunek.
Itsas jaiaren programak bi eduki mota izango ditu barruti bakoitzean: iraunkorra eta puntuala. Alegia, eremu bakoitzean hiru egunetan zehar mantenduko direnak, eta espresuki eskainiko diren ekintzak. Proposamenen artean lehentasuna izango dute parte hartzea bultzatzen dutenek.
Eragile nahiz norbanakoek proposamenak honako formulazio honen bidez aurkez ditzakete, edota posta elektroniko bidez mezua idatzi arduradunei. Era berean, HAZ bulegoetan ere ekarpenak egiteko orriak egongo dira edonoren eskura.
Antolatzaileek eskerrak eman nahi izan dizkiete dagoeneko jaso dituzten proposamenen arduradunei, bai eta barrutikako bileretara hurbildu diren herritarrei ere.
