Maider Ronquete eta Franco Cavalleriren ahots eta doinuek hartuko dute basilika
Duela urte eta erdi programatutako emanaldia zen Maider Ronquete soprano errenteriarrak eta Franco Cavalleri pianista uruguaitarrak eman behar zutena Madalenaren basilikan. Moldatuta dator orain.
Maider ronquete sopranoa eta Franco Cavalleri pianista, Maria Madalena Kultur Elkarteko kideekin. Duela urte eta erdi programatutako emanaldia zen Maider Ronquete soprano errenteriarrak eta Franco Cavalleri pianista uruguaitarrak eman behar zutena Madalenaren basilikan. COVID-19ak baina, bertan behera utzi zuen euren emanaldi hori, beste asko eta asko bezala, eta etxeratzea ezarri zuen. Emanaldi hura berreskuratuta berrartu ditu Maria Madalena Basilikaren Lagunak elkarteak bere ibilbidea; izan ere, pandemia hasi zenetik, egitaraua bertan behera uztea erabaki zuten. Izan behar zuen, baina izan ez zen kontzetuarekin hasiko dute berriro hilaren 27an, basilikan bertan.
Atzo aurkeztu zuten emanaldia, eta neurri murriztaileen mehatxua airean bada ere, ez dutela uste emanaldian eragingo duenik esan zuten.
Emanaldia moldatu egin dutela azaldu zuten Ronquetek eta Cavallerik, eta eskerrak eman zituzten basilikaren espazioa baliatzeko izan duten aukerarengatik, “esnaahi handia hartu du guretzat espazio honek, entseguak egiteko ere baliatu dugu”. Errepertorioari begira jarri zen piano jotzailea, eta hainbat aldaketa egin dituztela azaldu zuen, “klasikotik hasi eta folklorera. Herri errepertorioa izango da emango duguna”. Familia artean sentitzea nahi dutela bertaratzen direnak gaineratu zuen Ronquetek. Hala, boleroak, tangoa, zarzuela eta euskal folklorearekin lotutako doinuak entzuteko aukera izango da hilaren 27ko emanaldian. Kontzertu berezia izango dela esan zuen gainera, Ronquetek, “herriari abesten ariko naizelako”.
Protokoloa zorrotz beteko dutela esan zuten antolatzaileek, osasuna babesteko.
Emanaldirako gonbidapenak Madalenaren Ermitan jaso ahalko dira asteartea hilaren 23an eta osteguna, 25ean, 11:00etatik 13:00etara eta 18:00etatik 20:00etara. Telefonoz enbaki bat ere jarri dute eskura erreserba egiteko: 617 82 17 78.
Cavallerik kulturaren aldeko aldarria egin zuen azkenik, “Jendeak kultura behar du, are gehiago gaur egun. Kulturari ateak berriro ixtea ikaragarria liztatzeke”.
Ronquete eta Cavallerirekin hitzordua hilaren 27an, 20:00etatik aurrera Madalenaren basilikan.
