Zine ikusleen topaketa, hilaren 23an
Niessen zinemetan egingo dute topaketa, 19:30ean hasita. Solasaldia eta film baten emanaldia izango dira. Doan da, baina gonbidapena behar da.
Solasaldiaren ondoren, 'Familia de medianoche' filma emango dute. Zine ikusleen topaketa ibiltaria Errenteria-Oreretara iritsiko da hilaren 23an (asteartea). Zinemazaleen topagunea 19:30ean hasiko da, Niessen zinemetan. Lehenik solasaldia izango da, eta ondoren film baten emanaldia.
Solasaldian, galdera bati erantzuna ematen saiatuko dira hizlariak: nortzuk dira film laburren eta bestelako proposamen zinematografikoen ikusleak? Izan ere, badira ohiko zinema formatukoak eta iraupenekoak ez diren proposamenak bilatzen dituzten zinemazaleak, eta horien nahiak zertan diren aztertuko dute.
Ondoren, Familia de medianoche (Mexiko-AEB, 2018) film luzea emango dute.
Topagunera joateko sarrera doan da, baina aurrez gonbidapena eskuratu behar dute han egon nahi dutenek, udalaren sarrera zerbitzuaren bitartez, Lekuona Fabrikan, edo Niessenen bertan.
