Borroka dute pentsioak babesteko modu bakarra
Hileko lehen astelehenetan egiten du protesta kalean Duintasuna elkarteak, baina oraingoan, eta abenduan dauden jai egunak direla eta, astebetez aurreratu du hitzordua. Hala, hilaren 29an hartuko dute kalea, berriro, beti moduan 11:00etan Herriko Plazan elkartuta.
Hileko lehen astelehenetan egiten du protesta kalean Duintasuna elkarteak, baina oraingoan, eta abenduan dauden jai egunak direla eta, astebetez aurreratu du hitzordua. Hala, hilaren 29an hartuko dute kalea, berriro, beti moduan 11:00etan Herriko Plazan elkartuta. Oraingoan Belaunaldien Arteko Ekitate Mekanismoa aztertzeko beta hartuko dute manifestazio aurretik egiten duten elkarretaratzean.
Euskal Herriko Pentsiodunen Mugimenduak EHPM Espainiako Gobernuak, eta CCOO eta UGT sindikatuek Belaunaldien Arteko Ekitate-Mekanismo (MEI) berriaren gainean egindako akordioaren gaineko balorazioa egin du, eta bere egin du irakurketa hori Duintasunak. Onartu berri duten ekitate mekanismo hori, 2013ko lan erreformaren Iraunkortasun Faktorea ordezten du pentsiodunen mugimenduaren hitzetan, “Iraunkortasun Faktoreak pentsioen murrizketa aurreikusten zuen, pertsonen bizi itxaropenaren igoeraren aurrean. BAEM, ordea, 2023 eta 2032 bitartean kotizazioak &0,6 handitzea aurreikusten du pentsioen berme funtsa baliabidez hornitzeko; diru sarrerak handitzean hori positiboa bada ere, bigarren zati bat du, funts hori nahikoa ez balitz arazoa berriz planteatu beharko litzatekeela diona, gastuaren murrizketa kontuan hartuta”.
Belaunaldien Arteko Ekitate Mekanismoa ez da erabaki isolatu bat pentsiodunen mugimenduaren iritziz, “kongresuan izapidetzen ari den lege proiektuan pentsio sistema publikoari dagokionez jasotzen diren murrizketa multzoaren parte da”. Izan ere, 2011n onartutako murrizketak finkatzen dituela erretiroa 67 urte arte luzatuz, kalkulu aldia 15 urtetik 25 urtera pasaz, pentsio osoa kobratzeko kotizazio urteak 37 urtera igoz, eta murrizketa berriak prestatuz salatu du EHPM-k . Pentsioak erreformatzeko lege proiektua dela dio mugimenduak, “pentsio sistema publikoaren narriadura sendotzen duena, pentsio sistema pribatuak bultzatzeko”.
Pentsiodunen mugimenduaren aldarrikapen funtsezkoak ez aintzat hartu izana ere salatu du pentsiodunen mugimenduak Madrilgo Kongresuan izapidetzen ari diren lege proiektuan eta ezinbestekotzat jo du 2010 eta 2012ko lan erreformen indargabetzea, “pentsioen sistema publikoaren iraunkortasuna bermatu, eta lan prekarietatearekin amaitzeko”.
Horrenbestez, kalera deitu du, “borrokari eutsi behar diogu, hori baita gure aldarrikapenak kontuan har ditzaten berme bakarra, pentsioen sistema publikoa pribatizatzeko ahaleginaren salaketa publikoa egitea, pertsona guztiek pentsio duin eta nahikoa izatea lortzeko”.
