"EAJ, PSE: aldundiko LEPak atzeratu dituzue, udalekoak zergatik ez?"
Udaleko langileen erdia baino gehiago dago behin-behinekotasun egoeran. Lege aldaketa berria onartu arte lan eskaintza publikoa atzeratzeko eskatu dute.
40tik gora lagun elkartu dira gaur eguerdiko bilkuran. Soinua atera dute, euren egoerari buruz alerta pizteko. 
Agerraldi zaratatsua egin dute 40tik gora udal langilek eta haiei elkartasuna adierazi nahi izan dieten lagunek gaur eguerdian Trintxerpeko azokaren aurrealdean. Enegarren aldiz eskatu diote udal gobernuari urte bukaeran egitea aurreikusitako lan eskaintza publikoa atzeratzeko.
Haien eskaerari Gipuzkoako Foru Aldundiaren erabakia batu berri zaie, izan ere, berriki erabaki baitu gobernu organoak aurreikusita zituen hautaketa-prozesuak abenduan ez deitzea, eta horiek dekretu berria indarrean sartu ondoren egitea, araudia egokitzeko. Zioaren detaileak hemen irakur daitezke.
Pasaiako Udaleko langileen egoerari buruzko hainbat datu eman ditu Aitor Oteiza Langile Batzordeko presidenteak:
- Udal langileen %50 inguru dago bitartekotasun egoeran, alegia, postu finkorik gabe, behin-behineko kontratuekin.
- Horien artean, 50etik gora langile dira egoera hartan 5 urte baino gehiago daramatenak.
- Langile konkretu batek 30 urte daramatza bitartekotasun lanetan.
- Bide-garbitzaile guztiak, 15 langile, bitartekotasun egoeran daude, eta brigadakoen gehiena ere.
- Udaltzaingoaren lan poltsa salbuetsita, ez da udalean hautaketa prozesu librerik egin funtzionario postuetarako 2007tik. Hori dela eta, argi utzi du Oteizak behin-behinekotasun egokieran dauden langileek “ez dutela aukerarik izan plaza horiek betetzeko hautetsiak izateko”.
- Eragindakoen artean dauden 5 langileen behin-behinekotasun urteak batuta soilik, lan egindako 104 urte dituzte bizkarretan. Hots, bitartekotasun egoeran lan egindako mendea baino gehiago batzen dute bosten artean.
