Urre bat, zilar bat eta bi brontze pasaitarrentzat Bizkaiko Eskola Jokoetan
Bizkaiko Eskola Jokoen piraguismoko hirugarren eta azken proban medaila uzta oparoa erdietsi du Pasaia Kayakek. Oinatz Alonso garaile izan da bigarrengoz.
Ezkerretik eskuinera: Ekai Iraeta, Saul Herrero, Maialen Lizaso, Aihora Castro, Oinatz Alonso eta Gorka Bravo, Butroe ibaian. 
Urre bat, zilar bat eta bi brontze. Horixe izan zen Pasaia Kayakeko piraguistek Bizkaiko Eskola Jokoen hirugarren eta azken proban erdietsitako medaila sorta, joan den asteburuan, Plentzian.
Oinatz Alonso gailendu zen mutilen B azpikategorian, 19 minutu eta 4 segundoko denborarekin. Klubeko arduradunek Alonsorena ez ezik, Gorka Bravoren lana ere goraipatu dute, hirugarren izan baitzen hura A azpikategorian. Neskak ere txukun aritu zirela aitortu dute: Aihora Castro eta Maialen Lizaso bigarren eta hirugarren izan ziren, hurrenez hurren, B azpikategorian.
Hori horrela, Pasaia Kayakek aurtengo lehiaketak “zapore gozoarekin” bukatu dituela aitortu du Txema Yarza Etxebeste presidenteak. “Orain Eskola Kiroleko kimu eta haurrek gogotsu jarraituko dute neguko lanarekin udaberriko lehiaketak prestatzeko, euren formakuntzaren barruan”.
