"AHTaren zundaketa lanak isilpean, ilegalki eta engainu bidez egiten ari dira"
Zundaketak egiten ari den enpresaren parean elkarretaratzea egin zuten atzo AHTaren kontra daudenek. Lizentziarik gabeko zundaketak direla adierazi dute.
Donostiako Zuatzu parkean dagoen Ikerlur enpresaren atarian elkarretaratzea egin zuten atzo hainbat herritarrek, tartean zirela Oiartzungo, Errenteria-Oreretako eta Lezoko biztanleak. Salaketa mobilizazioaren arrazoia, AHTaren lanen gaineko zundaketak: “Ikerlur enpresa gure herrietan zundaketak egiten ari da, isilpean, ilegalki eta engainu bidez”.
AHTaren kontrakoek azaldu dute Astigarraga-Lezo trazatu berriaren kontrako alegazioak aurkeztu direla, tartean daudelarik kaltetutako udalak zein norbanakoak. “Alegazio hauek ebazteko zain gauden bitartean, trazatuko hainbat lekutan zundaketak egiten ari dira. Are larriago, nahitaezko lizentziarik gabe egiten ari dira zundaketak. Legez kanpokoak dira, beraz”. Ikerlur enpresa egoeraz jakitun lanak egiten ari dela salatu dute ekintzaileek. Besteak beste, udalen lizentziarik gabe ari direla zundaketa lanetan adierazi dute: “Udalen aldetik gelditze agindua jaso ondoren, berriro ere toki berean lanei ekitea are larriagoa da. Zundaketa eskaerak ez dituzte tramitatu ere egin”.
Atzoko mobilizazioan izan zirenek zehaztu dute, Oiartzungo Udalak ekainean esan ziola Ikerlur enpresari lanak geldi zitzala. Baina horiei azaroan berrekin zietela, “udal aginduari muzin eginez”. Bigarrenez eten ditu enpresak lanak, Oiartzungo Udalaren gelarazte agindua, bigarrenez, jasota”.
Zundaketak etetea, eta aldi berean AHTaren egitasmoa behin betiko baztertzea eskatu zuten, aldi berean, atzoko mobilizazioan.
