Jendarte osoa da ezinbesteko lan, pentsio eta bizi duinen aldeko borrokan
Mobilizazio eguna izan zen atzokoa Hego Euskal Herrian, eta goizean hiriburuetan manifestazioak egin bazituzten, arratsaldean herrietara eraman zuten lan, pentsio eta bizi duinen aldeko aldarria.
Lan, pentsio eta bizitza duinen aldeko elkarretaratzea, atzo iluntzean Errenteria-Oreretan. Mobilizazio eguna izan zen atzokoa Hego Euskal Herrian, eta goizean hiriburuetan manifestazioak egin bazituzten, arratsaldean herrietara eraman zuten lan, pentsio eta bizi duinen aldeko aldarria. Deialdiaren atzean, ELA, LAB, ESK, STEILAS, Etxalde, Hiru, CGT eta CNT sindikatuak; haien deialdia babesten eragile ugari, lan eta pentsio erreformei ezetz esateko.
Manifestazioa zegoen deituta Errenteria-Oreretan 19:00etan Herriko Plazatik abiatuta, baina eguraldi txarra zela eta, elkarretaratzea egin zuten bildutako pertsonek. Euripean aldarrikatu zuten bizi duinaren aldeko eskubidea.
Lan guztiak aitortu eta banatzeko neurriak beharrezkoak direla esan zuten bildutakoek, eta enplegurako baldintza duinak bermatzeko garaia dela ere, “prekarietatera kondenatutako langile belaunaldi berrion aldarrikapena da hau, bazterrean eta ezkutuko lanetan gauden emakumeona, bizirauteko nahikoa ez diren langabezia prestazioak jasotzen ditugunona”.
Argi esan zuten atzoko protestan, gainera, ez dutela onartuko urteetako borrokaren ondorioz irabazitako eskubideen murrizketarik, eta besteren artean, pentsio duinerako eskubidea aldarrikatu zuten, “bai orain pentsiodunak garen eta etorkizunean izango garenonak, genero arrakalarik gabeko pentsio sistema, eros ahalmen errealari lotutakoa, propioa, publikoa eta unibertsala”.
Pertsona guztien bizitzak, herria eta planeta beraren biziraupena erdigunean jarriko dituzten politikak galdegin zituzten, “gutxi batzuen diru eta botere gosearen gainetik”. Eta horretarako ezinbestekoa jo zuten “norabide aldaketa sakon bat”.
Sindikatu eta eragileen mezu argia egunotan eztabaidagai diren lan eta pentsioen erreformen harira: “Ez gaude prest gure bizitzak pobretu eta prekarizatuko dituzten murrizketa berriak onartzeko”. Borroka horretan, jendarte osoa, belaunaldi denak ezinbestekoak direla ere jarri zuten mahaigainean, finean guztiei eragiten die prekarietateak, guztiei eragingo die lehenago edo geroago pentsio duin baterako eskubideak, edota guztiek pairatzen dute pertsonen gainetik bestelako interesak jartzen dituzten politiken eragina. Hortaz, lanerako eta borrokarako gonbita ere egin zuten atzoko protestaren bidez, eta batzera deitu zituzten herritar guztiak: “Arrazoiak ez zaizkigu falta, badago gauzak egiteko beste modua, eta hemen gaudenok, prest gaude norabide horretan borrokan jarraitzeko. Bereizita eta desmobilizatuta nahi gaituzten honetan, elkarrekin indartsuagoak gara”.
