63 emakumeren bizitza eta borroka, erakusketa batean
'Lumineszenteak: emakumeen aurkako indarkeria ikusezinak plazaratzeko 63 historia' izeneko erakusketa bisitatu ahal izango da Pasaiako lau liburutegietan ostegunetik aurrera.
Datorren hilaren 9tik (osteguna) 24ra bitarte Lumineszenteak: emakumeen aurkako indarkeria ikusezinak plazaratzeko 63 historia izeneko erakusketa bisitatu ahal izango da Pasaiako lau liburutegietan. Inaugurazioa hilaren 9an izango da, 19:00etan, Donibaneko Ubera liburutegian hain zuzen.
Erakusketa honek 2018 eta 2021 bitartean Palestinan, Indian, Lakota Nazioan eta Euskal Herrian elkarrizketatutako 63 emakumeren bizi historiak jasotzen dituela azaldu dute antolatzaileek. Igone Mariaezkurrena kazetaria eta Irantzu Pastor argazkilariek osatu dute erakusketa elkarlanean. Izen bereko liburu batean oinarritu dira erakusketa egiteko.
“Nola egiten dio aurre emakume palestinar batek minbizia bezalako gaixotasun bati lurralde okupatuetan? Nolakoa da Indiako emakume alargun baten bizitza? Nola bizirauten du bost urte zituelarik Indiarrentzako Barnetegi batera indarrez eraman eta bere hizkuntza, kultura eta jatorria ahaztera behartu zuten Ipar Amerikako emakume natibo batek? Zer nolako indarkeria pairatzen du emakume ijito batek?”. Galdera hauei eta beste askori erantzuten saiatu da bikotea.
Bikoteak azaldu du “su motelean egositako lan autogestionatua” izan dela.
