[Galeria] Aurtengo Xabier Lete Prosa eta Poesia Lehiaketak baditu irabazleak
Atzo egin zuten XXXIV. edizioaren sari banaketa. Saritutako lan guztiekin liburuxka bat osatuko du udalak, udaberrian kaleratzea da asmoa.
Xabier Lete XXXIV. Prosa eta Poesia Lehiaketaren sari banaketa jaso zuen atzo arratsean udaletxeko pleno aretoak. Josu Delgado Euskara zinegotziak eta Aitziber Arnaiz Euskara teknikariak aurkeztu zuten ekitaldia. Aretoa lepo utzi zuten herritarrek, hamarka guraso eta lagun bildu ziren bertan.
Irabazleek, sariarekin batera (liburu eta materialetarako bonua eta esku dirua helduen kasuan), Jokin Mitxelena ilustratzaileak sortutako marrazki bat ere jaso zuten atzo. Gaztetxoak haien lanak irakurtzen ari ziren bitartean sortu zituen Mitxelenak, zuzenean.
Udaletik aurreratu dutenez, saritutako eta aipamen berezia jaso duten lan guztiak liburuxka batean kaleratuko dituzte, udaberri inguruan, eta herriko ikastetxeetako ikasleek ere ale bana jasoko dute.
Pello Añorga, Sohalge Arbelaitz, Imanol Irigoien, Intxixu AEK euskaltegia, Goiatz Labandibar, Olatz Mitxelena, Aingeru Palomo, Marijo Telletxea eta Ttur-Ttur Euskaltzaleon Bilguneko kideek egin dituzte epaile lanak.
Prosako atalean, Elaia Lasa Galbentzu eta Xuhar Larretxea Muxikak eskuratu dute lehen saria; bigarrena Luka Ellenrieder Goikoetxeak eta Kattin Garai Mendiburuk (aipamen berezia jasoko du Irati Zabalo Aranburuk); hirugarrena Oier Frantsesena Arnaiz eta Udane Bereau Kortajarenak (aipamen berezia jaso zuen Maddi Susperregi Yerobik); laugarrena Nara Susperregi Barrosok eta Xuhar Sarasola Amigorenak (aipamen berezia jaso zuen Leire Suarez Yagueren lanak), bostgarrena Uxue Etxeberria Elizetxeak eta Lide Larrea Etxebestek (Mattin Gelbentzu Beristainek aipamen berezia jaso zuen); eta azkenik, seigarrena Malen Frantsesena Arnaizek eta Mattin Etxebeste Sanzberrok.
Poesian aldiz, hirugarren sailean Aitor Agirre Gonzalez eta Laiene Castellano Otegi saritu dituzte (Mireia Sagarra Martinek aipamen berezia jaso zuen); laugarren sailean Ekhi Arizmendi Teiletxeak eta Joane Irigoien Etxebestek (aipamen berezia Ilargi Ziaurritz Olaziregirentzat); bostgarren sailean Jurgi Arbelaitz Guridi eta Unai Wolfram Rekalt saritu zituzten, eta seigarrenean aldiz, Lohizune Telletxea Delgado eta Ane Garmendia Irastorza (Maren Aginaga Boteren lanari aipamen berezia egin zioten).
