Gipuzkoan Gazte Tourrek Errenterian jarriko dio ginga aurtengo emanaldi sortari
Musika eta arte eszenikoen gaineko hainbat jarduera biltzen dituen Gipuzkoan Gazte Tour programak Errenteria-Oreretan izango du azken ekitaldia hilaren 19an.
Sanchez eta Palencia gaurko agerraldian emanaldia hartuko duen Sorlekua auditorioaren sarreran. Argazkia: Herri Bizia Musika eta arte eszenikoen gaineko hainbat jarduera biltzen dituen Gipuzkoan Gazte Tour programak Errenteria-Oreretan izango du azken ekitaldia hilaren 19an. Antolaketan, Gipuzkoako Foru aldundia eta hainbat udal ari dira lankidetzan. Arrasate, Zumarraga, Andoain, Hondarribia eta Eibar pasa ostean, Errenteria-Oreretan jarriko dio aurtengoari ginga 12-25 urte arteko gazteentzako antolatutako kultur zirkuituak. Artista ezagunak eta herriko artistak uztartzen dituen egitaraua eskainiko da, “horrela udalerrian dugun talentua sustatzeko”, azaldu du Isaac Palencia aldundiko Gazteria zuzendariak.
Xabier Sanchez Agirregomezkorta Gazteria zinegotziak hartu du parte gaurko agerraldian Palenciarekin batera. Sanchezek azaldu duenez, hainbat agertoki ezberdin aurreikusi dituzten osasun larrialdiarekin lotuta, eta egungo egoerara erabat egokitzen den agertokia prestatu dute emanaldirako Lekuona Fabrikan, “400 pertsona inguruk kontzertuaz eserita gozatu ahal izango dute”.
Askotariko kartela ondu dute emanaldirako, “herriko gazteen gustuak kontuan hartuta”. Masterclassa izango dute gazteek goizetik, 19an bertan, Graffity tailer interaktiboa zehazki GKO Galleryren eskutik. Pintura teknikak ezagutu, diseinuak nola sortu ikasi, eta bi mural sortuko dituzte. Bestetik, DJ Artie Escolar ere arituko da. Sarrera doakoa izango da eta 11:30ean egingo dute Agirre Lehendakariaren plazan.
Kontzertuari dagokionean, Lekuona Fabrikan izango da 18:00etan hasita. Dantzal Sound DJa, Laina (Ainara Rodriguez), Zetazen eta Green Valley ariko dira. Sarrerak, 3 euro.
