Nøgenen kontzertua eta Porrotx eta Marimototsen emanaldia, atzeratuta
COVID-19 kasu positiboen gorakada medio, bihar eta etzi Juanba Berasategin eskaintzekoak ziren saioak gibelatzea erabaki du Donibaneko Jai Batzordeak.
Aurrerago eskainiko dituzte bi saioak, egoera epidemiologikoak ahalbidetzen duenean. 
Biharko eta etzirako, hurrenez hurren, antolaturiko Porrotx eta Marimototsen emanaldia eta Nøgen musika taldearen kontzertua atzeratzea erabaki du Donibaneko Jai Batzordeak, udalerriko egoera epidemiologikoa dela medio.
Antolatzaileek adierazi dute Pasaiako kasu positiboen azken egunotako gorakadak egoera “oso larria” sortu duela, eta nahiago dutela, hori horrela izanik, “zero arrisku” hartzea euren gain.
Sarrerak erosita zituzten norbanakoei banan-banan deitzeko eta azken orduko ezeztapenaren berri emateko konpromisoa hartu du batzordeak. Horiei bi aukera eskainiko dizkiete: saioetarako sarrerak aurreragorako gordetzea, edota ordaindutakoa (Nøgenen kasuan) bueltan jasotzea.
