Gourmet Bag ekimena iritsi da Pasaia, Errenteria eta Oiartzunera
Egitasmoak ostalaritza eremuan ematen den elikagaien xahuketa murriztea du helburu, eta horretarako 2.000 ontzi berrerabilgarri banatu dira aurtengo hirugarren edizioan.
Iragan astean, Gipuzkoako Foru Aldundiko Ingurumen Departamentuak, Gipuzkoako Ostalaritza Elkarteak eta Impact Hub Donostiak Gourmet bag 3.0. proiektuaren hirugarren edizioa aurkeztu zuten. Hiru entitateok, ostalaritzaren eremuko elikagaien xahuketak murriztea du xede ekimen honen bidez; jatetxeetan eskatzen diren baina jaten ez diren elikagaiak ez xahutzea, alegia.
Egitasmo honi esker, Gourmet Bag ontzi ekologikoak banatuko dira jatetxe parte-hartzaileetan, bezeroek nahi izanez gero soberako anoak etxera eramateko. Hemendik aurrera, beraz, Pasaia, Errenteria eta Oiartzungo zenbait jatetxeetan Gourmet Bag -ak egongo dira eskuragarri; Lasarte-Oria eta Hernaniko beste zenbaitetan bezala.
2018an burutu zuten lehen edizioan Donostiako establezimendu ezberdinek parte hartu bazuten ere, bigarrenetik aurrera Gipuzkoako udalerri ezberdinetako establezimenduek hartu dute parte. Aurten, 18.000 euro bidez sustatu du proiektua Gipuzkoako Foru Aldundiak, eta 2.000 ontzi banatu dira hirugarren edizio honetan.
Jose Ignacio Asensio Ingurumeneko diputatuak eta Kino Martinez Gipuzkoako Ostalaritza Elkarteko idazkari nagusiak kanpainak kontzientziaziorako balio duela ere azpimarratu dute. Izan ere, bezeroei ontziez gain informazioa banatu zaie; elikagaien xahuketaren aurka konprometitutako establezimenduak azkar batean identifika ditzaten.
