Emakumeen ekarpenaren kontaketa josten jarraituko dute
Bigarren maila batean, ezkutuan geratu den hori bistaraztea, eta Errenteria-Oreretari emakumeek egindako ekarpena lehen lerroan jartzea dute helburu Mariasun Landa Sariek.
Maite Brandariz, Mariasun Landa, Aizpea Otaegi, Eli Etxabeguren eta Mari Jose Molinaren bikotekide izandakoa eta semea. Bigarren lerro batean utzi dituzte urte luzeetan, letra larriz idatzitako Historian aitortzarik gabe, nahiz eta paper garrantzitsua izan duten eta duten, ezinbestekoa. Batzuk gauza handiak egin dituzte, besteek txikiak, besteek eguneroko jardunarekin joan dira historia idazten, baina guztiek egin dute ekarpena, txikia, ertaina hala handia. Bigarren maila batean, ezkutuan geratu den hori bistaraztea, eta Errenteria-Oreretari emakumeek egindako ekarpena lehen lerroan jartzea dute helburu Mariasun Landa Sariek.
Oharkabean hamabi ekitaldi bete ditu Errenteriako Berdintasun Planaren parte den ekintzak, eta bidean altxor ugari azaleratu herriko emakumeen kontaketaren sokak etenik ez dezan izan. Kulturari, hezkuntzari, kirolari, enpleguari… egindako ekarpenak biltzen ari dira lehiaketaren bidez, osatu gabea eta ezinbestekoa den herri kronika osatzeko.
Urtero bezala, honakoan ere bi sari, Emakumezkoen begirada lanik onena (450 euroko saria) eta Emakumezkoei begirada lanik onena (450 euroko saria).
Bi idazlan irabazleak, gainera, 2022ko Oarso Aldizkarian argitaratuko dira, eta inguruko hedabideetan argitaratu ditzaten saiatuko da udala; HITZA-k euskarazko lan irabazleak argitaratzen ditu urtero. Bi lanetatik bat gutxienez euskaraz aurkeztutako lana izango da.
Lehiaketaren oinarriak honako hemen daude ikusgai. Udalak herritar guztiak deitu ditu parte hartzera, bereziki, emakumeak.
