Gabonetako Haur Jaiak barruti guztiak hartuko ditu
Hilaren 27tik 29ra (astelehena eta asteazkena, hurrenez hurren) jolas, tailer, pailazo eta magoek girotuko dute udalerria.
Artxibo irudia da honakoa. Barruti bakoitzean mago bat izanen da hurrengo egunetan, 4 urtetik gorakoentzat gozagarri. 
Iazko etenaldiaren ostean, hemen da, urteroko legez, Pasaiako Gabonetako Haur Jaia. Aurtengo egitaraua hiru egunez luzatuko da, datorren asteko astelehenetik (hilak 27) asteazkenera (hilak 29), biak barne. Egun horietan jolas, tailer, pailazo eta magoek hartuko dituzte barruti guztiak.
Egitaraua Pasaiako Udaleko Haur, Nerabe eta Gazteen Sustapen Sailak antolatu du, Trintxerpeko Ekaitza Aisialdi Taldearekin nahiz San Pedro, Donibane eta Antxoko udal ludotekekin elkarlanean. Hiru egunetan hainbat jolas eta tailer egonen dira, eta mago bana barruti bakoitzeko. Hona hemen detaileak:
- Astelehena, hilak 27
-
- Barruti guztietan. Jolasak eta Gabonetako apaingarriak egingo dituzte txikienek.
- Donibanen. Hodei magoak emanaldia eskainiko du Juanba Berasategin, 17:30ean hasiko den Ezinezkoaren logika ikuskizunarekin. 4 urtetik gorako haurrak sartu ahal izango dira, eta, lekurik balego, baita haien senideak ere. Gabonetako Haur Jaian parte hartzen duten haurrek lehentasuna izango dute.
- Asteartea, hilak 28
- Barruti guztietan. Adin desberdinetara egokitutako jolas eta tailerrak.
- Asteazkena, hilak 29
- jolas eta tailerrez gain, hainbat ikuskizun izango dira.
- Antxon. Tomaxen abenturak pailazo taldeak Adi, grabatzen, ekin ikuskizuna eskainiko du 18:00etan kultur etxean.
- San Pedron. Magiklown mago-pailazoak udal aretoan arituko dira 18:00etan.
- Trintxerpen. Eriz magoa 17:45ean Karmengo Ama eskolako gimnasioan izanen da, Auskalo ikuskizunarekin.
Aipaturiko jarduera eta jolasak arratsaldeko 16:00etatik 19:00etara izango dira honako areto hauetan: Antxoko Kultur Etxean, Trintxerpeko Karmengo Ama eskolan, Donibaneko udal ludotekan eta San Pedroko Udal Aretoan. Bai jarduerak eta bai ikuskizunak doakoak izango dira, Pasaiako 4 urtetik gorako haur guztien gozagarri.
