Akordioa lortu dute Urkabe Benetan enpresako langileek
Akordioak biltzen dituen neurrien artean, datozen urteetako soldaten igoerak, kategorien igoerak zein aldi baterako lanaldien mugapena daude.
Akordiora heldu dira Urkabe Benetan enpresaren zuzendaritza eta langile batzarra. LAB sindikatuak jakinarazi duenez, Okin taldeko Urkabe Benetan enpresaren zuzendaritza eta langile batzarra akordiora iritsi dira. Masti-Loidi industriaguneko lantegian martxotik zeramaten langileek hitzarmena berritzeko eskatzen, lan baldintza duinen alde. Bada, azkeneko asteetan lau orduko lanuzteak eta greba egunak egin ostean, enpresak negoziatzeko erabakia hartu zuen; eta gaur, prekaritatearen aurkako akordioa eskuratu dute langileek.
Sindikatuaren arabera, akordioak hurrengo neurriak barnebiltzen ditu: aldi baterako lanaldiak mugatzea, 2021an soldata igoerak KPIaren gainetik 0,25 puntuan kokatzea, 2022ko KPIa, 2023an soldatak KPIaren gainetik 0,5 puntuan kokatzea eta 2024rako 0,25 puntu KPIaren gainetik. Era berean, kategoria baxuenean dauden langileak kategoriaz igoko dira eta bertan behera geldituko dira enpresak inposatu nahi zituen soldata igoerarako baldintzak.
Langile batzarrak atzo eman zion oniritzia akordioari, bertan parte hartu zuten 71 langileetatik 59ren babesarekin.
