AHTren Astigarraga-Lezo trenbide zatia ez egiteko mozioari argi berdea
AHT Geldituk, Eguzkik eta Ekologistak Martxan eragileek AHTaren salgaientzat izango litzatekeen Astigarraga-Lezo trenbide zatia egin ez dadin eskatzeko mozioa aurkeztu zuten joan den asteazkenean plenoan.
AHTaren aurka egindako martxa baten irudia. AHT Geldituk, Eguzkik eta Ekologistak Martxan eragileek AHTaren salgaientzat izango litzatekeen Astigarraga-Lezo trenbide zatia egin ez dadin eskatzeko mozioa aurkeztu zuten joan den asteazkenean plenoan. Zati hori bertan behera uzteko eska diezaiola udalak Espainiako Trantsizio Ekologikorako Ministerioari galdegin zuten. Arlo ekonomikoari erreparatu zion mozioak gainera: “Inongo justifikaziorik ez duen proiektuan diru publikoa ez xahutzea, eta diru publiko hori gizarte beharretara zuzentzea eskatzen dugu mozio honen bidez. Zaintza publikoa, enplegua, hezkuntza eta gizarteko gainerako beharrek lehentasuna eduki behar dute, soilik batzuentzako egin nahi duten azpiegitura erraldoi eta defizitarioaren aurrean”.
Plenoan bertan hitza hartu zuen mozioa aurkeztu zuten eragileen ordezkari batek. Hark, gogor salatu zuen sekula demokratikoki eztabaidatu ez den proiektua dela, “jendearekin kontatu gabe egin da eta hamar kilometroko trazatua egiteak 500 milioi euroko kostua izango du”. Beste salaketa ere jarri zuen ordezkariak mahai gainean, trazaketa onartu ez bada ere, zundaketa “ilegalak” egiten ari direla, “udalari akta altxatzea eskatzen diogu”.
Kexu ere azaldu ziren mozioaren aurkezleak. Izan ere, EAJ, gaiaren gainean beste mozio bat aurkeztu zuen, “baina azken unean aurkeztu du eta ez dugu aukerarik izan aztertzeko ere”.
Eskaerari argi berdea eman zion plenoak Elkarrekin Errenteria eta EH Bilduren aldeko botoekin.
Plenoaren ostean balorazioa egin dute mozioa aurkeztu duten eragileek eta EAJri “inposizioarekin tematzea” eta alderdi sozialistari herritarren beharren alde egin beharrean “diru xahuketaren” alde egitea egotzi die: “PSE-EEren gezurrak salatu nahi ditugu gainera, legez kanpoko zundaketak salatzeko egin dugun protesta, pankarta zabaltzea, esku orriak banatzea eta kartelak pegatzea, delitutzat aurkeztu duelako”.
Bi alderdiei “eztabaida demokorako jarrera” egotzi die eta Tapia deituriko lege aldaketa proiektuarekin lotu dute. “udalen eskumenak gero eta urriagoak izango dira, herrietako bizi kalitatearen kaltetan”. Mozioa gehiengo osoz onartu izanagatik “pozik” azaldu dira, bestalde, eta herritarrak AHTaren kontrako mobilizazioetara deitu dituzte, “oraindik garaiz gabiltza gure ingurumena eta ondasun publikoak txikituko dituen megaproiektu antzu hau gelditzeko”.
