EH Bildu: "Antxoko anbulatorioa behin-behineko barrakoietatik atera"
Osasun zentroari behin betiko kokapen bat emateko galdegin du koalizioak Legebiltzarrean. EAJ eta PSE-EE eskaeraren aurka agertu dira.
Antxoko anbulatorioa behin-behineko barrakoietan dago kokatuta gaur egun. 
EH Bilduk Pasaia Antxoko osasun zentroa gaur egun behin-behinean duen kokapenetik atera beharra aldarrikatu du gaur goizean Legebiltzarrean, “lehenbailehen” behin betiko kokapen batera lekualdatzeko. Hala galdegin dio Rebeka Ubera Aranzeta EH Bilduko legebiltzarkideak Jaurlaritzaren Osasun Sailari.
Koalizio abertzaleko kideak gogora ekarri du barrutiko osasun zentroak 10 urte daramatzala behin-behinekotasunean, 5.300dik gora lagunei zerbitzu aproposa eman ezinik, “baldintza egokienak eskaintzen ez dituzten modulu prefabrikatu batzuetan”. “Onartezin” iritzi dio Uberak egoerari. “Horren ondorioz, adibidez, pandemian PCR probak kalean egin behar izan dituzte”.
EAJ eta PSE-EE EH Bilduren proposamenaren aurka agertu dira Legebiltzarrean.
