Lezoko emakume ezagunen argazki erakusketa abiatu nahi du udalak
Hezkidetza Mahaia osatzen duten eragileek martxan jarritako iniziatiba da, eta Martxoaren 8aren testuinguruan prest egotea nahi dute.
Lezoko emakume ezagunen erakusketa, abian.
Herriko emakume ezagun edo nabarmenen argazki erakusketa eratu nahi du Lezoko Udalak. Hezkidetza Mahaia osatzen duten eragileek bultzatutako iniziatiba da, eta memoria historiko eta aitorpen ariketa bat egitea du helburu: “Emakumeek historian barrena zein gaur egun herriaren bilakaeran betetako rol eta funtzio garrantzitsuak ikusaraztea”.
Mahaikideek azaldu dutenez, “edozein ogibide, zaletasun, izaera, edo bestelako arrazoiak medio, herrian garai batean ezagun izan ziren, edo gaur egun, edozein arlotan nabarmentzen diren andreen erretratuekin osatu nahi dugu erakusketa”.
Horretarako, baina, herritarren laguntza eskatu du udalak, eta etxean gordeta dituzten argazkiak haien esku uztera animatu ditu. Irudiak garai batekoak zein gaur egungoak izan daitezke, eta udaletxean aurkeztu beharko dira urtarriletik aurrera. Paperean, eskaneatuta edota webgunean prestatuko den atalaren bitartez aurkeztu ahal izango dira, ondoko datuak zehaztuz: erretratatuaren izen-abizenak, adina eta jaiotze data, bizitokia, ofizioa, zaletasuna, seme-alabak…
Deitzaileek adierazi dutenez, urtarrilean emango dituzte iniziatibaren inguruko xehetasun gehiago.
