Lezoko eskrima kirolariak, bikain Eskolarteko Ligan
Eskolarteko Ligako lehen jardunaldian hainbat podium egin dituzte herriko tiratzaile gazteek. Bekoerroetan biltzen dira entrenatzera.
Lezoko eskrima kirolari edo tiratzaileek emaitza bikainak lortu zituzten Eskolarteko Ligako lehen jardunaldian. Izan ere, Lezok eskrima taldea du, eta Bekoerrota kiroldegian izaten dira trebatzen. Arduradunek adierazi dute edonor joan daitekeela kirola probatzera. Gipuzkoan zale askoko kirola dela jakinarazi dute.
Emaitzei erreparatuta, podiuma maiz zapaldu zuten lezoar tiratzaileek. Markel Amat (Pasaia-Lezo Lizeoa) lehena izan zen Haur Mailan, Paul Muñoz (Lezo Institutua) hirugarrena, Eneko Castillo (Pasaia-Lezo Lizeoa) zazpigarrena eta Aner Galvez (Pasaia-Lezo Lizeoa) bederatzigarrena.
Kimu Mailan, Ibai Makibar (Pasaia-Lezo Lizeoa) hirugarren izan zen, Ander Lopera (Lezo Herri Eskola) zazpigarrena, eta Jon Ruiz (Lezo Herri Eskola) bederatzigarrena.
Benjaminetan, Ekhi Aiestaranentzat (Pasaia-Lezo Lizeoa) izan zen lehen postua, Aratz Aiestaran (Pasaia-Lezo Lizeoa) bosgarren gelditu zelarik. «Berri zoragarria herrian hasi berri diren kirolarientzat», esan dute taldeko arduradunek.
