Olazar errekako estaldura kenduko dute
Horrekin batera errekaren bidea birbideratuko dute. Urtarrilaren 10ean dira hastekoak lanekin. Errekaren bidea handituta, uholde arriskua ekidin nahi da.
San Pedro auzoko Eugenio Otxoa kalearen ondotik Olazar erreka pasatzen da. Lezoko Udalak iragarri du urtarrilaren 10ean hasiko direla inguru horretan errekak duen estalkia kentzen, eta aldi berean ingurunea naturalizatzen. Udalak eta Uraren Euskal Agentziak (URA) 2020an sinatu zuten hitzarmen baten harirako lanak dira; URAk Lezoko hainbat inguru ikuskatu, eta lehentasuntzat jo zuen han lanei ekitea. Lanekin ibaiaren tarte horretan sekzio eskasia konponduko da, eta hondeaketa egiten denean (erreka berbideratuko da) ur emari handiagoa eraman ahal izango du errekak, uholdeak saihestuz.
URAk landu duen egitasmoaren arabera, hiru fasetan egin beharko lirateke lanak. Udalak, momentuz, zati bat egitea erabaki du. Zehazki Eugenio Otxoa kalean errekak duen estaldura kenduko da, Lezo Bertsolaria kalearekin bat egiten duen puntura arte (105 metro inguru).
Beste bi faseak, esan bezala oraingo egin gabe geldituko direnak, honakoak dira: bat, kale horretako errepide azpiko galeria egitea (Lezoko Udalak egin beharko luke), eta bestea Elias Salaberriako ageriko zatiarekin elkartea (URAk hartuko luke beregain).
Esan bezala, ibilbide berria izango du zonalde horretan errekak. Egungo espaloiarekin lerrokatzen saiatuko dira, kalearekiko eragina ahalik eta txikiena izan dadin. Mendebaldeko espaloian eragina izango dute lanek, ordea, eta horregatik han dauden aparkalekuak baterian egotetik lerroan egotera pasatuko dira.
Errekari sei metroko zabalera emango diote. Horregatik, han dauden 11 platanondo kenduko dira; hala ere, ibai ertzetako zuhaitz eta zuhaizkak landatuko dituzte errekaren bi aldeetan. Ezkerreko aldean buztinezko geruza bat jarriko dute filtrazioak ekiditeko.
Obrek iraun bitartean inguru horretako bizilagunek Algeposan aparkatzeko aukera izango dute. Aldez aurretik, ordea, baimena eskatu behar da, eta giltza eskuratu.
