AHTren Astigarraga-Lezo trazatua bertan behera uzteko eskatu du udalak
Abenduko ohiko udalbatzarra egin zuten atzo. Ekologistak Martxan eta Eguzkik aurkeztutako mozioa onartu zuten, EAJk kontra bozkatu arren.
Atzoko saioko irudia da. Abenduko ohiko udalbatzarra egin zuten atzo arratsaldean udaletxean, urteko azkenekoa. Besteak beste, Ekologistak Martxan eta Eguzkik aurkeztutako mozioa onartu zuten EH Bilduko kideen aldeko botoekin (EAJk kontra bozkatu zuen), AHTren Astigarraga-Lezo trazatua (Oiartzundik pasatuko litzatekeena) bertan behera uzteko eskatu zuten.
Ingurumen zinegotzi Eneritz Arbelaitzek 2020ko ekainean udalak trazatuari alegazioak sartu zizkiola gogoratu zuen. “Udalak AHTren eragina aztertua du behin baino gehiagotan eta eragin negatiboak positiboak baino gehiago izango direla badakigu; ez da errentagarria ez sozioekonomikoki ezta ingurumenaren ikuspegitik ere”, esan zuen atzoko udalbatzarrean. Horri lotuta, jakinarazi zuen ETS enpresa bitan baimendu gabeko zundaketak egiten topatu dutela Oiartzunen, “eta gerarazi” egin dituztela.
Ekologistak Martxan taldeko kide Kepa Olaiz pozik azaldu zen onartutako mozioarekin, aurkeztutako alegazioak “oso egokiak” direlako haien ustez. Donostiari kalterik ez egiteko inguruko bailarak kaltetzen ari direla erantsi zuen. “25 urte daramatzagu AHTren kontuarekin. Urte hauetan bi krisi ekonomiko, enpresen berregituratzeak, pandemia bat… bizitu ditugu.
Zer falta da, gutxienez planteatzeko AHTra bideratutako dirua beste
sektore batzuetara bideratu behar litzatekeela momentu honetan?”.
AHTren gaineko mozioaz gainera, lehen sektorerako 60.000 euroko diru laguntza lerro bat zabaltzea onartu zuten atzokoan, aho batez. Jon del Olmo Ogasun zinegotziak esan zuen sektoreko profesional asko hurbildu zaizkiela, “kezkatuta”, bereziki pentsuaren eta argindarraren prezioen igoerarekin.
Bestalde, enplegua sustatzeko Oarsoaldea mailako hitzarmena ere onartu zuten. Honen arabera, eskualdeko lau udalen arteko hitzarmen honetan Errenteria-Orereta izango da Lanbideren aurreko ordezkaria, eta Jexux Leonet alkatea Oiartzungo ordezkaria.
Amaitzeko, 2022ko Gizarte Ongizate saileko diru laguntzen oinarriak eta deialdiak ere onartu zituzten atzoko bilkuran, aho batez gainera. Hala, adingabekoak ardurapean dituzten familiak laguntzeko 130.000 euroko bideratuko dituzte eta bazterkeria arriskuan dauden norbanako eta familiak laguntzeko aldiz, 90.000 euro. Landa eremura bideratutako programak mantentzeko 50.400 euro bideratzea onartu zuten (aho batez ere) eta amaitzeko, HELTArekin ikasturte honetako diru laguntza eta Haurtzaro Ikastolarekin hitzarena beste lau urtetarako luzatzea ere onartu zuten.
