Bost kultur sari berrirekin itxi du urte oparoa Iñigo Legorburuk
Literatur nahiz argazkilaritzan eginiko lanengatik golardatu dute sortzaile oreretarra urtea bukatzearekin batera. "Urte oso bateko lanaren emaitza".
Kultur arloko bost sari berrirekin bukatu du urtea Iñigo Legorburu sortzaile oreretarrak. Idatzizko nahiz argazkilaritzako obrengatik golardatu dute Legorburu, gaurdaino bilduriko 118 sarira igoaz haren palmaresa, guztira 17 erdietsi dituelarik 2021ean zehar.
Hilabete eta erdi baino gutxiagoan, zortzi lehiaketatan izan da saritua Legorburu, kasu, Orereta Ikastolak Gau Beltzaren inguruan antolaturiko beldurrezko mikro-kontakizunen lehiaketan lehen saria, Gipuzkoako Eskualde Etxeetako Mikrokontakizunen V. Lehiaketako bigarren saria, edota EHUk antolaturiko X. Oihenart Aforismo lehiaketan erdietsiriko bigarren postua.
Kontakizun laburretan, etorri berriei laguntzeko Afro elkarteak antolatutako lehiaketan beste zilar bat lortu zuen Errenteria-Oreretako idazleak bi pertsona migratzaileren arteko elkartzeari buruz idatziz.
Idazle lanetan ez ezik, argazkilaritzan ere egin ditu merituak Legorburuk, Buruntzaldeko AEK-k antolaturiko argazki lehiaketaren garaile suertatu delarik. “Argazkia sinplea da, baina iraganaren eta etorkizunaren arteko lotura sinbolizatzen du”, mintzatu da egilea aurkeztutako obrari buruz, “historia ez ahazteko beharra, aurrera egiten jarraitzeko”.
Urtea bukatzeko lorturiko sariengatik “oso pozik” dagoela aitortu du oreretarrak, “urte oso bateko lanaren emaitza izan baitira”. Orain, “atseden txiki bat” hartuko du sortzaileak, idazten jarraitzeko eta erronka berriz josiriko 2022 bati aurre egiteko.
