Hiru ikastaro berri dakartza Pasaiako Jabetze Eskolak
Hilaren 10etik 26ra bitarte egongo da zabalik negu-udaberrira bitarteko egitasmoan izena emateko epea. Jarduera guztiak doakoak dira.
Hil honetatik apirilera bitarte eskaintza berria barne hartuko du Pasaiako Jabetze Eskolak. 
Pasaiako Udalak udalerriko emakumeen ahalduntzearen, autonomia garatzearen eta osasunaren alde lan egiteko ikastaroak antolatu ditu, aurten ere, Jabetze Eskolaren baitan. Azken lauhilekoan 160 emakume inguruk hartu zuten parte, eta bide horretan pausoak ematen jarraitzea dute asmo.
Negu-udaberrirako egitasmoak hiru ikastaro berri hartuko ditu apirilera artean: jan sano eta pozik bizi; lodifobia gorpuzten; eta sororitatea eta ahalduntzea: indarguneak eta aliantzak eraikitzen. Horiez gain, emakume korrikalarien taldean izena emateko aukera ere zabalduko da.
Bestalde, urte osoko taldeak ere martxan izango dira: jatorri askotariko emakumeen taldea; indarkeriarik gabeko espazioa: autolaguntza taldea; eta ongi zaintzen eta maitatzen ikasteko taldea.
Eskolako eskaintza guztiz doakoa den arren, ezinbestean izena eman beharko da hilaren 10etik 26era bitarte. Hori egiteko nahiz ikastaroen egutegia, ordutegia eta informazio zehaztua irakurtzeko, jo Pasaiako Udalaren webgunera.
