Kirol-instalazioak zuzenean kudeatuko ditu udalak
Udalaren harridurarako, BPXport enpresak utzi egin du udaleko kirol-instalazioen kudeaketa. Hortaz, udalak beregain hartu du instalazioen eta langile subrogatuen kudeaketa, eta kiroldegiak normaltasunez ari dira funtzionatzen urtarrilaren 1etik. Esleipen berri baterako lizitazioa irekita dago jada.
Bernar Lemos, Aizpea Otaegi eta Maite Gartzia, prentsaurrekoan. Udal kirol-instalazioak (Galtzarabordako eta Fanderiako kiroldegiak eta Beraungo igerilekuak) zuzenean kudeatzen hasi da udala urte hasieratik, 2019ko martxotik kudeaketa lanetan aritu den BPXport enpresak egiteari utzi diolako.
Gaur goizean eginiko agerraldian, Aizpea Otaegi alkateak, Maite Gartzia Kiroletako zinegotziak eta Bernar Lemos zinegotziak azpimarratu dute BPXport enpresak kudeaketa uztea ulertezina izan dela, legearen aurkakoa delako eta ondorio gogorrak ekar ditzakeelako enpresarentzat.
COVID-19aren harira egon diren murrizketek aldaketak ekarri dituzte kirol-instalazioen erabileran eta diru-sarreren murrizketan. Hori dela eta, COVID-19ak eztanda egin zuenean, baldintza ekonomikoak berriro orekatzeko negoziazio prozesu bat ireki zen udalaren eta BPXport enpresaren artean.
Udalak egindako proposamenak eta bi aldeei mesede egingo liekeen irtenbide negoziatu bat lortzeko ahaleginean, akordiora heltzea ezinezkoa izan da, udalaren ustez enpresaren eskakizunak neurriz kanpokoak izan direlako.
Udalak argi izan ditu bere lehentasunak: diru publikoa zentzuz erabiltzea, kirol-instalazioak irekita mantentzea herritarrei zerbitzua emateari ez uzteko eta subrogatutako pertsonen enplegua babestea. Negoziazioak eten eta enpresak instalazioak uzteko erabakia hartu duenez, udalak zuzeneko kudeaketa beregain hartu du.
Enpresarekin mantendu den negoziazioa abenduaren 30era arte egon zen irekia, baina prebentzio-neurri gisa, abenduaren 15ean gaia presaz jorratu zen udaleko bilkuran, eta kudeaketa zuzena beregain hartzea onartu zuen, betiere enpresak kontratua uztearen baldintzapean.
Aurretiko enpresak dagoeneko alde egin duenez, esleipen berri baterako lizitazioa abian da, eta kudeaketa zuzena martxora arte luzatuko dela aurreikusten da.
Normaltasuna zerbitzuan
Kirol-instalazioen zuzeneko kudeaketa ez da gobernu taldeak planifikatutako zerbait, baizik eta zerbitzua kudeatzen ari zen enpresaren erabakiak eragindako egoeraren ondorio bat, bere kabuz eta legearen aurka erabaki baitu kirol-instalazioak uztea.
BPXport enpresak lanak utziko zituen jakinarazpena abenduaren 3an komunikatu zuen, berrorekari buruzko negoziazioak irekita zeudela. Ordutik, udalak azkar eta gogor egin behar izan du lan irtenbide bat bilatzeko.
Aldaketa bortitza izan den arren, kirol-instalazioak normaltasunez funtzionatzen ari dira urtarrilaren 1etik. Oarsoaldea S.A.k Errenteriako Udalaren bitarteko propio denak, kudeatzen ditu orain langile subrogatuak.
Instalazioen funtzionamenduari dagokionez, ez da inolako aldaketarik aurreikusten. Udalaren asmoa da egungo eskaintzari eustea eta erabiltzaileek kirol esparruetan aurkezten diren proposamenez gozatzen jarraitzea. Oraingo ordutegia ere mantenduko dela esan dute. Dena den, udaleko kideek gogorarazi nahi izan dute COVID-19aren bilakaerak aldaketak edo egokitzapenak sor ditzakeela kirol-instalazioen erabileran.
