Igerilekuetako saneamendurako partidak bere horretan jarraitzen duela dio Eguzkik
Eguzki Oarsoaldeak salatu du igerilekuetako saneamendurako onartutako partidak bere horretan jarraitzen duela eta udalari eskatu dio hartutako konpromisoak bete ditzan.
Argazkia: Eguzki Aspalditik dago kezkatuta Eguzki Oarsoaldea Lezoko saneamenduaren egoerarekin. 2020ko ekainaren 5ean horren inguruko idatzi bat bidali zioten udalari, eta erantzuna urte bereko azaroaren 16an jaso zuten. Besteak beste, igerilekuetako ur zikinak kolektorera bideratzeko 2021eko aurrekontuetan lan horiek egiteko partida onartuko zela jakinarazi zieten erantzun horretan.
2021eko urte hasieran Lezoko Udalarekin izandako harremanetan saneamenduko sarearen egoeraz mintzatu ziren, eta Altamirako zuzeneko isuria, Jaizkibelgo etorbidearena eta igerilekuetako saneamenduaren egoerak mahai gainean jarri zituzten. Eguzkik azken honen inguruan egin nahi du enfasia, izan ere, igerilekuko saneamendurako aipatutako partida ez zegoen udaleko aurrekontuetan. Eguzkitik argi utzi zioten udalari “ur zikinak inongo tratamendurik gabe errekara botatzen jarraitzea ahalik eta azkarren konpondu behar zela”, eta horretarako “udalak behar ziren erabakiak hartu beharko lituzkeela obrak egiteko behar zen dirua onartzeko eta aurrez hartutako konpromisoa betetzeko”.
Udalarekin izandako bilkuran, udalak “oso jarrera positiboa” azaldu zuela dio talde ekologistak, eta aurrekontuetan egon ez arren, “urtean zehar helburua gauzatzeko behar zen diru kopurua onartuko zutela” berretsi zuten, finantziaziorako aukerak aztertuz. Hori dela eta, Eguzkik gaia lotutzat eman zuen.
2022an sartu gara jada, eta “egoerak bere horretan” jarraitzen duela salatu nahi du Eguzki Oarsoaldeak. “Egoera klimatikoak eskatzen duen jarrera trinkoa gehienetan hitzetan gelditzen dela eta ingurumenarekiko sentsibilitate minimorik ez dutela” azpimarratu dute. Bi urte dira Eguzkik eskaera egin zuela eta udalaren “jarrerarekin argi geratu da lehentasuna ez dela ingurumena”.
