Pentsioen eta etorkizunaren alde Donostiara deitu du Duintasunak
Lau urte bete dira pentsiodunen eta jubilatuen mugimenduak kalea hartu zuenetik bizitza eta etorkizun duin bat aldarrikatzeko. Errenteria-Oreretan, urte batzuk lehenago bete zuten kalea pentsio eta zahartzaro duinen aldeko aldarriarekin.
Duintasunak iaz egindako elkarretaratzeetako batetako irudia. Lau urte bete dira pentsiodunen eta jubilatuen mugimenduak kalea hartu zuenetik bizitza eta etorkizun duin bat aldarrikatzeko. Errenteria-Oreretan, urte batzuk lehenago bete zuten kalea pentsio eta zahartzaro duinen aldeko aldarriarekin; aurten bederatzi urte beteko dira, zehazki. Egun, indarrean mantentzen duten urteetako borrokaren ostean, bide horrek eman dizkien lorpenak, eta oraindik ere lortzeke direnen bilana egiteko une egokia iritzi diote mugimenduko kideek larunbatean egingo duten mobilizazio handiaren bezperetan.
Lau urteko borrokarekin erdietsitako lorpenen artean Pentsioen Balorizazio Indizea ezartzeari utzi izana, jasangarritasun faktorea indarrean jartzeko epea atzeratzea, pentsioen igoera, alarguntza pentsioa arautzeko soldataren kalkulua %60ra igarotzea, Lanbidearteko Gutxieneko Soldata 735,9 eurotik 900 eurora pasatzea, 52 urtetik gorakoen sorospen eskubidea berreskuratzea, eta gizarte segurantzako kotizazioak %0,6 igotzea aipatu ditu pentsiodunen mugimenduak.
Lortu gabe direnen zerrenda ere egin du. Horien artean, tranpa duen aurtengorako KPI igoera aipatu du, kotizazio karrera luzeei ez zaiela zigorra kendu, Belaunaldien Arteko Ekitate Mekanismoa ezabatzea, edota 67 urtera arte erretiro adina atzeratu izana, 1.080 euroko gutxieneko pentsioa, genero arrakala murriztea, gutxieneko soldata batez besteko soldataren %60an ezartzea, eta lan eta pentsioen erreformaren alderdi negatiboak ezabatzea dira lortzeke dituztenak. “Horiek guztiak ezabatzeko borrokan jarraituko dugu—berretsi dute— eta larunbatean Donostian egingo dugun manifestazioarekin bat egitera deitu nahi ditugu herritar guztiak, gaurko pentsioak, bai, baina batez ere, etorkizunekoak babesten ari garelako. Gure presioa kalean mantendu behar dugu”.
Hitzordua, Donostiako Alderdi Ederren izango da larunbatean 12:00etan. Herritar denen parte hartzea, ezinbestekoa, oraina eta etorkizuna delako jokoan.
