'Miss karaoke', EHAZE Liburuak bildumara bildu dute
Euskarazko antzerkigintza bere osotasunean bultzatzeko, prestigioa emateko, eta ikusgarri egiteko sortu zen EHAZE, Euskal Herriko Antzerkizaleen Elkartea.
Oier Guillan, idazle, kazetari eta antzerkigile oreretarra. Argazkia: Metrokoadroka EHAZE Elkartearen liburu bilduma propioaren parte bihurtu da Oier Guillan idazle, kazetari eta antzerkigile oreretarraren Miss Karaoke: sormen prozesu baten erraiak liburua.
Euskarazko antzerkigintza bere osotasunean bultzatzeko, prestigioa emateko, eta ikusgarri egiteko sortu zen EHAZE, Euskal Herriko Antzerkizaleen Elkartea. Euskara, Euskal Herri osokoa, independentea, erreferentea, eta eraldatzailea bezalako oinarrien gainean eraikia da elkartea, besteak beste. 2016az geroztik, abian du EHAZE liburuak liburu bilduma propioa, euskal teatroaren barruan sor daitezkeen gogoetak eta transmisio beharrak asetzen laguntzeko.
Oier Guillan eta Metrokoadroka dira Miss Karaoke: Sormen prozesu baten erraiak liburuaren egileak, Edurne Azkarate eta Javier Barandiaranen kolaborazioarekin. EHAZE elkarteak definitu du Guillanen lana: “Hibridazio, identitate, auto pertzepzioa, generoen auzia, eta halaber, antzezpenari buruzko gogoetak zentrifugatu zituen Guillanek Miss Karaoken, betiere, irudi poetiko, umoretsu eta kitschak erabiliz. Argitalpenean ez du irakurleak aurkituko antzerki naturalistaren ez logikarik ez manerarik”.
Liburuan Miss Karaoke antzezlanaren bi bertsio daude eskuragai: jatorrizko testua, eta oholtzara eraman zena, sormen prozesuari buruzko kronika mamitsu batekin batera.
